არასრულწლოვნის ცემაში ბრალდებული სპორტსმენი ხატია ვიბლიანი მოსამართლემ დარბაზში ჩაცმულობის გამო არ შეუშვა

არასრულწლოვნის ცემაში ბრალდებული სპორტსმენი ხატია ვიბლიანი მოსამართლემ დარბაზში ჩაცმულობის გამო არ შეუშვა. 

სასამართლო სხდომაზე მოსამართლე ლელა მარიდაშვილმა, ვიბლიანს მოკლე მაისურის გამო საყვედური გამოუცხადა:

„ეს რა არის? სასამართლო დარბაზში ნორმალურად უნდა იყოთ ჩაცმული! იცით, სად ხართ? ასეთ ტანსაცმელში დარბაზში ვერ შეგიშვებთ!“, - თქვა მოსამართლემ. 

არასრულწლოვანის მიმართ განხორციელებულ ძალადობაში ბრალდებულ მკლავჭიდელს, ხატია ვიბლიანს აღკვეთის ღონისძიების სახით 3 000-ლარიანი გირაო შეეფარდა.

აღნიშნული გადაწყვეტილება მოსამართლე ლელა მარიდაშვილმა მიიღო.

სახელმწიფო ბრალდება დაკავებულის მიმართ აღკვეთის ღონისძიების სახით 3 000-ლარიანი გირაოს გამოყენებას მოითხოვდა.

როგორც პროკურორი ნათია ნოზაძე აცხადებს, ხატია ვიბლიანმა 15 წლის ბავშვს ხელებისა და ფეხების გამოყენებით მიაყენა ფიზიკური შეურაცხყოფა.

დაცვის მხარის განცხადებით, ბრალდებული დანაშაულს აღიარებს, ინანიებს, თანამშრომლობს გამოძიებასთან.