საქართველოს პროკურატურის წარმომადგენლებმა ფემიციდის წინააღმდეგ ბრძოლის კამპანიის ფარგლებში, ტყიბულის მუნიციპალიტეტში საინფორმაციო შეხვედრა გამართეს

გენდერული ნიშნით მოტივირებული ქალთა მკვლელობების წინააღმდეგ საინფორმაციო კამპანიის - „არა ფემიციდს“ ფარგლებში, ქუთაისის რაიონული პროკურატურის პროკურორებმა, მოსახლეობასთან საინფორმაციო ხასიათის შეხვედრა გამართეს.

პროკურორებმა შეხვედრის მონაწილეებს ინფორმაცია მიაწოდეს ფემიციდის, ქალთა მიმართ გენდერული ძალადობის და ოჯახური დანაშაულის წინააღმდეგ პროკურატურის მიერ განხორციელებული ღონისძიებებისა და არსებული გამოწვევების შესახებ. ასევე, ისაუბრეს მოწმისა და დაზარალებულის კოორდინატორების სამსახურის როლზე, რომლებიც აქტიურად არიან ჩართულები მსგავსი სახის სისხლის სამართლის საქმეებში და მათი მოვალეობა, სწორედ დაზარალებულთა და მსხვერპლთა მხარდაჭერა და გაძლიერებაა.

შეხვედრაზე განსაკუთრებული ყურადღება დაეთმო ქალთა გენდერული ნიშნით მკვლელობების გამომწვევ მიზეზებს, გენდერული სტერეოტიპების განხილვას, მსგავსი სახის საქმეების გამოძიების, პროცესში მტკიცებულებათა მოპოვების პრობლემატიკას, დანაშაულის პრევენციისთვის საზოგადოების ჩართულობის მნიშვნელობას. ასევე, თუ რა ბარიერებს აწყდებიან ქალები, როდესაც ისინი ძალადობის მსხვერპლნი ხდებიან.

შეხვედრა ინტერაქტიულ ფორმატში წარიმართა. დამსწრე პირებმა დასვეს შეკითხვები და განიხილეს რეალური შემთხვევები. შეხვედრის დასასრულს შეხვედრის მონაწილეებმა  შეავსეს ანონიმური კითხვარი ქალთა მიმართ ძალადობის და ოჯახში ძალადობის მიმართ საზოგადოების დამოკიდებულების შესახებ.

ფემიციდის წინააღმდეგ საინფორმაციო კამპანიის მიზანი ქალთა მიმართ და ოჯახში ძალადობის წინააღმდეგ საზოგადოების ცნობიერების ამაღლება და ფემიციდის დანაშაულების პრევენციაა. სწორედ ამ მიზნით, საქართველოს პროკურატურის წარმომადგენლები საქართველოს სხვადასხვა რეგიონსა და ქალაქში საზოგადოების წარმომადგენლებთან შეხვედრებს აქტიურად განაგრძობენ.