ხანძარი ძველ აბაშაში - დამწვარია თხილის პლანტაციები

ძველი აბაშის ადმინისტრაციულ ერთეულში, სოფელ ვედიდკარში, წუხელ ცეცხლი ერთ-ერთი საწარმოს ტერიტორიაზე, თავდაპირველად დაახლოებით, 2 ჰექტარამდე თხილნარის ბაღებს გაუჩნდა.

ძლიერი ქარის გამო კი ხანძრის არეალი გაფართოვდა.

გავრცელებული ინფორმაციით, ზარალი გაცილებით მეტია.

დამწვარია, დაახლოებით 4 ჰექტარზე მაღალშემოსავლიანი და ასევე სარეაბილიტაციო ფართობი.

ხანძრის ქრობის პროცესში ჩართული იყვნენ აბაშის, სენაკის, ხობისა და ზუგდიდის სახანძრო-სამაშველო სამსახურების წარმომადგენლები.

აბაშის მუნიციპალიტეტის ტყვირისა და ქოლობნის ადმინისტრაციულ ერთეულებსა და ნინოშვილის ქუჩაზე გაჩენილი ხანძრის კერები სრულად ლიკვიდირებულია.

ინფორმაციას აბაშის მერია ავრცელებს.

ამავე ცნობით, ცეცხლი ეკალ-ბარდებს ეკიდა და მიმდებარე ტერიტორიაზე გავრცელდა.

„აბაშის მუნიციპალიტეტის ტერიტორიაზე ხანძრების პრევენციის და შესაძლო გართულებების თავიდან აცილების მიზნით, მოგიწოდებთ, გამოიჩინოთ მაღალი სამოქალაქო პასუხისმგებლობა, არ დაანთოთ ცეცხლი სასოფლო-სამეურნეო სავარგულებზე, ტყის ან ველის სიახლოვეს, ასევე, არ დატოვოთ ცეცხლის კერები უყურადღებოდ“, - ნათქვამია მერიის გავრცელებულ განცხადებაში.