,,ამბავი იმის შესახებ, რომ მაიმუნები "უპატარავეს გალიებში, მინუს გრადუსში იყინებიან", აბსოლუტური სიცრუეა" - ჭიათურის მერია

„სოციალურ ქსელში ჭიათურის მუნიციპალიტეტთან დაკავშირებით მორიგი დეზინფორმაცია ვრცელდება.

გამოგონილი ამბავი იმის შესახებ, რომ გედების ტბასთან დაბინავებული მაიმუნები „უპატარავეს გალიებში, მინუს გრადუსში იყინებიან", აბსოლუტური სიცრუეა და საერთო არაფერი აქვს სინამდვილესთან", - ამის შესახებ ჭიათურის მერიის პრესსამსახურის მიერ გავრცელებულ ინფორმაციაშია ნათქვამი.

მერიის ინფორმაციით, მაიმუნები იმყოფებიან შესაბამის პირობებში და მათი სამყოფელი თბება ნორმის ფარგლებში.

,,რეალობა კი ასეთია - ისინი იმყოფებიან შესაბამის პირობებში და კლიმატის ცვლილების გათვალისწინებით ხდება მათი მოვლა, იზოლირებული არიან ენოტებისგან, მათი სამყოფელი თბება ნორმის ფარგლებში.

ჩვენს მინი-ზოოპარკში დაბინავებულ ყველა ცხოველს და ფრინველს მეთვალყურეობას უწევს სპეციალისტი.

ეს არ არის პირველი შემთხვევა, როდესაც ჩვენს მუნიციპალიტეტთან დაკავშირებით მიზანმიმართულად ხდება მსგავსი აბსურდული თემების წამოწევა, თუმცა სიმართლე მალევე ირკვევა, რადგან ჩვენ საქმეს არ ვაკეთებთ ფასადურად, ვინმესთვის თავის მოსაწონებლად, ჩვენ ვშრომობთ ჩვენი მუნიციპალიტეტისთვის, ჩვენი მოქალაქეებისთვის და ამის გადაფარვა სიცრუით შეუძლებელია", - აღნიშნულია ჭიათურის მერიის პრესსამსახურის მიერ გავრცელებულ ინფორმაციაში.

ცნობისთვის, სოციალურ ქსელში გავრცელდა ინფორმაცია და ფოტო იმის შესახებ, რომ ჭიათურაში, მაიმუნებს პატარა გალიაში, ტბასთან, მინუს გრადუსში ამყოფებენ.

სიცივისგან კი, მაიმუნები ერთმანეთს ეხუტებიან გასათბობად.