ზოგჯერ ინსტრუქციის წაკითხვა სასიცოცხლოდ მნიშვნელოვანია - ექსპერტმა ყველაზე საშიში 5 საოჯახო მოწყობილობა დაასახელა

ჩვენ ხშირად ვიყენებთ საყოფაცხოვრებო ტექნიკას ისე, რომ ინსტრუქციებს უჯრაში ვდებთ და აღარ ვუბრუნდებით. თუმცა მნიშვნელოვანია გვახსოვდეს, რომ ელექტრომოწყობილობები შეიძლება უკიდურესად საშიში იყოს და არასწორი გამოყენების შემთხვევაში ხანძრის საფრთხეც კი შექმნას. სწორედ ამიტომ ტექნიკას მაქსიმალური სერიოზულობით უნდა მოვეკიდოთ, წერს SlashGear.

გამოცემა აღნიშნავს, რომ ზოგიერთი მოწყობილობა სხვებზე უფრო სახიფათოა. მაგალითად, თმის საშრობი ფენი დიდი დატვირთვით მუშაობს და ძლიერ ცხელდება, რაც უკვე ზრდის რისკებს. დიდი სისტემები, როგორიცაა საშრობი მანქანები, ასევე სერიოზულ საფრთხეს წარმოადგენენ მაღალი ტემპერატურის გამო. გარდა ამისა, მათში ხშირად გროვდება ბუსუსი (ბეწვი), რომელიც ადვილად აალებადია და დამატებით რისკს ქმნის. ზოგიერთ შემთხვევაში რეგულარული გაწმენდა პრობლემების თავიდან აცილებაში ეხმარება, თუმცა ეს ყოველთვის მარტივი არ არის.

სტატიაში დასახელებულია ყველაზე საშიში საყოფაცხოვრებო მოწყობილობები და მიზეზები, რის გამოც ისინი ასეთებად მიიჩნევა. ძირითადად, ეს არის ტექნიკა, რომელიც დიდი რაოდენობით სითბოს გამოიმუშავებს და შეიძლება გადახურდეს, გაუმართაობის, დაბინძურების ან არასწორი განთავსების გამო ხანძარი გამოიწვიოს.

სარეცხი და საშრობი მანქანები
ტანსაცმლის გარეცხვა და გაშრობა ტექნიკის გარეშე ხშირად რთულია. თუმცა საქმე მხოლოდ კომფორტს არ ეხება. Whirlpool-ის მონაცემებით, საშრობ მანქანაში ტემპერატურა შეიძლება 80°C-ს და მეტსაც კი აღწევდეს, მოდელისა და რეჟიმის მიხედვით. აშშ-ის ხანძარსაწინააღმდეგო ეროვნული ასოციაციის ინფორმაციით, 2010 წლიდან დაწყებული ოთხი წლის განმავლობაში, ყოველწლიურად დაახლოებით 16 ათასი ხანძარი ფიქსირდებოდა, რომელიც სარეცხ ან საშრობ მანქანებს უკავშირდებოდა. შემთხვევების 8%-ში მიზეზი სარეცხი მანქანები იყო, ხოლო საშრობებთან დაკავშირებული ხანძრების დაახლოებით მეოთხედი მტვრის, ბოჭკოების ან ბუსუსის დაგროვებამ გამოიწვია.

ბუსუსი განსაკუთრებით საშიშია, რადგან ძალიან ადვილად აალებადია და თანდათან ჰაერის ნაკადს ბლოკავს. შედეგად, სითბო გროვდება და შეიძლება ხანძარი გაჩნდეს. მნიშვნელოვანია საშრობი მანქანის სავენტილაციო არხების რეგულარული გაწმენდაც, რადგან ბუსუსი მხოლოდ ფილტრში არ გროვდება. საშრობი ერთ-ერთი ყველაზე დიდი და ძლიერი მოწყობილობაა სახლში, ამიტომ მისი გამოყენებისას აუცილებელია განსაკუთრებული სიფრთხილე და მწარმოებლის ინსტრუქციების დაცვა.

2. ელექტრო გამათბობლები
ელექტრო გამათბობლები შესაძლოა გათბობის ყველაზე იაფი საშუალება არ იყოს, მაგრამ ისინი ხელმისაწვდომი და ეფექტიანია. ამასთან, ეს არის მოწყობილობები, რომელთა გამოყენებისას უკიდურესი სიფრთხილეა საჭირო. საშრობების მსგავსად, ისინი დიდ რაოდენობით სითბოს გამოიმუშავებენ და ხანძრის საფრთხეს ქმნიან. ბევრ პორტატულ გამათბობელს მაღალი სიმძლავრე აქვს, რაც უკვე რისკს წარმოადგენს, თუ არასწორად შეირჩევა შეერთების ადგილი.

ასეთ მოწყობილობებს ხშირად 1500 ვატზე მეტის მოხმარება შეუძლიათ (მოდელის მიხედვით), რაც ნიშნავს, რომ მათი შეერთება დამაგრძელებელზე სხვა მოწყობილობებთან ერთად ქსელის გადატვირთვას იწვევს. ეს ხშირად ავტომატური გამთიშველების ამოქმედებას განაპირობებს, თუმცა ისინი ყოველთვის ვერ აფერხებენ ხანძარს. დამატებით საფრთხეს ქმნის გამათბობლის განთავსება ადვილად აალებად ნივთებთან ახლოს, საბნებთან, ავეჯთან, ფარდებთან. როგორც ყველა სითბოს წარმომქმნელი მოწყობილობა, გამათბობლები საჭიროებენ სივრცეს სითბოს გასაფანტად, ხოლო ელექტროგაყვანილობა რეგულარულად უნდა შემოწმდეს სპეციალისტების მიერ.

3. ყავის აპარატები
ყავის აპარატები ძალიან ცხელ წყალზე მუშაობს, რაც არასწორი გამოყენების ან გაუმართაობის შემთხვევაში დამწვრობის რისკს ქმნის. თუმცა საფრთხე მხოლოდ ამით არ შემოიფარგლება.

ყავის აპარატის შიგნით არსებული თბილი და ნოტიო გარემო იდეალურ პირობებს ქმნის საფუარისა და ბაქტერიების გამრავლებისთვის. ეს განსაკუთრებით აქტუალურია ოფისებში, სადაც აპარატებს ხშირად იყენებენ, მაგრამ იშვიათად წმენდენ. აუცილებელია წყლის რეზერვუარისა და სანიაღვრე ლანგრის რეგულარული გარეცხვა, თუმცა არანაკლებ მნიშვნელოვანია მათი სრულად გაშრობა, წინააღმდეგ შემთხვევაში შესაძლოა ობი გაჩნდეს. ასევე საჭიროა ფილტრების რეგულარული შეცვლა და ნადების მოცილება.

4. ტოსტერები
ისევე როგორც საშრობებში ბუსუსი ან ღუმელში ნადები, ტოსტერში დაგროვილი ნამცეცები დროთა განმავლობაში სულ უფრო საშიში ხდება, თუ ისინი არ იწმინდება. თუნდაც მოდელს ჰქონდეს ამოსაღები ლანგარი, ნარჩენების ნაწილი მაინც გროვდება ძნელად მისადგომ ადგილებში. ინტენსიური გამოყენებისას ეს პატარა ნამცეცები შეიძლება საშიშ ტემპერატურამდე გაცხელდეს და ხანძარი გამოიწვიოს.

5. ღუმელები, ქურები და სახარშავი ზედაპირები
გამოცდილ მზარეულებსაც კი შეუძლიათ სერიოზულად დაიწვან ღუმელზე, ამიტომ სამზარეულოს ეს ცენტრალური ელემენტი ერთ-ერთ ყველაზე საშიშ მოწყობილობად ითვლება. ისინი არსებობს როგორც გაზის, ისე ელექტრო ვერსიებში და თითოეულს თავისი რისკები აქვს.

გაზის მოდელები საშიშია ღია ცეცხლისა და გაზის შესაძლო გაჟონვის გამო, მაშინ როცა ელექტრული ხასიათდება გაყვანილობის პრობლემებისა და უყურადღებობის შედეგად ხანძრის გაჩენის რისკით. გაზის გარეშეც კი, ელექტრო ქურებმა შეიძლება ხანძარი გამოიწვიოს, თუ ისინი უყურადღებოდ დარჩება ან ზედმეტად მაღალი ტემპერატურა გამოიყენება. რეგულარული გაწმენდა კრიტიკულად მნიშვნელოვანია, რადგან დამწვარი საკვები შეიძლება აალდეს. ინდუქციური ქურები ამცირებს დამწვრობის რისკს და არ იყენებს გაზს, თუმცა ისინი ძალიან სწრაფად აცხელებს ჭურჭელს. განსაკუთრებით საშიშია ზეთის სწრაფი გაცხელება, რაც უსაფრთხოების წესების დაუცველობის შემთხვევაში ხანძრის მიზეზი შეიძლება გახდეს.