სმარტფონის ეკრანის გაწმენდისას ამ საშუალებებს მოერიდეთ - რჩევები სპეციალისტისგან

სმარტფონის ეკრანზე ყოველდღიურად გროვდება თითის ანაბეჭდები, მტვერი და სხვა დაბინძურება, ამიტომ მისი რეგულარული გაწმენდა აუცილებელია. თუმცა, მიუხედავად იმისა, რომ თანამედროვე ტელეფონების ეკრანები და კორპუსები მინისგან არის დამზადებული, მათი გაწმენდა ჩვეულებრივი მინის საწმენდი საშუალებებით არ შეიძლება.

არასწორად შერჩეულმა ქიმიურმა საშუალებამ შესაძლოა ეკრანის დამცავი ოლეოფობური საფარი დააზიანოს. სწორედ ეს საფარი ამცირებს თითის ანაბეჭდებისა და ცხიმის კვალის გაჩენას და ეკრანის ზედაპირს უფრო გლუვს ხდის.

ტელეფონის ეკრანის გასაწმენდად უმჯობესია არ გამოიყენოთ:

ჩვეულებრივი მინის საწმენდი სითხე;
მათეთრებელი საშუალებები;
წყალბადის ზეჟანგი;
უხეში ქსოვილი ან ქაღალდის ხელსახოცები;

განსაკუთრებით ფრთხილად უნდა იყოთ ძლიერი ქიმიური ნივთიერებების გამოყენებისას. მათ შესაძლოა ეკრანის ზედაპირი და მისი დამცავი საფარი დააზიანონ.

როგორ გავწმინდოთ ტელეფონი სწორად

ყოველდღიური გაწმენდისთვის საუკეთესო არჩევანია რბილი,  მიკროფიბრის ქსოვილი. საჭიროების შემთხვევაში ის შეიძლება ოდნავ დაასველოთ საპნიანი წყლით, თუმცა ქსოვილი კარგად უნდა გაწუროთ - ის ნესტიანი უნდა იყოს და არა სველი.

კიდევ ერთი ვარიანტია 70-პროცენტიანი იზოპროპილის სპირტის გამოყენება, მაგალითად, შესაბამისი სადეზინფექციო ხელსახოცის სახით. თუმცა სპირტიანი საშუალებების ძალიან ხშირი გამოყენებაც არ არის სასურველი, რადგან დროთა განმავლობაში მან შესაძლოა ოლეოფობური საფარი დააზიანოს.

გაწმენდის დაწყებამდე რეკომენდებულია ტელეფონის გამორთვა და ქეისის მოხსნა. საწმენდი სითხე პირდაპირ სმარტფონზე არ უნდა შეასხუროთ - ის ჯერ ქსოვილზე უნდა მოხვდეს.

ტელეფონის გაწმენდისას ყურადღება მიაქციეთ კამერების ირგვლივ, გვერდით ღილაკებსა და სხვა დეტალებს. განსაკუთრებით ფრთხილად უნდა იყოთ დამტენის პორტთან, დინამიკებთან და სხვა ხვრელებთან, რათა მათში სითხე არ მოხვდეს.

ისიც უნდა გახსოვდეთ, რომ ტელეფონის წყალგამძლეობა არ ნიშნავს, თითქოს მოწყობილობის სპეციალურად დასველება უსაფრთხოა.

ასევე არ არის რეკომენდებული სმარტფონის გაწმენდა მაშინ, როდესაც ის დამტენზეა შეერთებული - ნესტისა და ელექტროენერგიის კომბინაციამ შესაძლოა მოწყობილობის დაზიანება გამოიწვიოს.

ქეისის გაწმენდაც მნიშვნელოვანია

ტელეფონის ქეისზე შესაძლოა არანაკლები ჭუჭყი დაგროვდეს, ვიდრე თავად სმარტფონზე. პლასტმასისა და სილიკონის ქეისების გაწმენდა შესაძლებელია საპნიანი წყლით ან 70-პროცენტიანი იზოპროპილის სპირტით.

თუ ქეისი ნატურალური ტყავისგან არის დამზადებული, სპირტის გამოყენებას უმჯობესია მოერიდოთ. მას შეუძლია ტყავი გამოაშროს და დროთა განმავლობაში ბზარების გაჩენა გამოიწვიოს. ასეთ შემთხვევაში უფრო უსაფრთხო ვარიანტია ოდნავ ნესტიანი რბილი ქსოვილი და მცირე რაოდენობით რბილი საპონი.

მთავარი წესი

სმარტფონის გასაწმენდად რთული პროცედურა საჭირო არ არის: გამორთეთ მოწყობილობა, გამოიყენეთ რბილი მიკროფიბრი და არ დაასხათ სითხე პირდაპირ ტელეფონზე.