პრემიერი

ყველა ქრისტიანს ვულოცავ დღევანდელ დღეს, მინდა ჩვენს  ხალხს მშვიდობა და სტაბილურობა ვუსურვო - ირაკლი ღარიბაშვილი

საქართველოს პრემიერ-მინისტრმა ქრისტიანებს აღდგომის დღესასწაული მიულოცა. როგორც ირაკლი ღარიბაშვილმა სამების საკათედრო ტაძარში, ჟურნალისტებთან საუბარში განაცხადა, პატრიარქის სააღდგომო ეპისტოლე ძალიან საინტერესო, ღრმა და ბრძნული იყო.

"მე მინდა ყველა ქრისტიანს მივულოცო დღევანდელი დღე, ქრისტე აღდგა! მე მინდა ჩვენს ერს, ჩვენს ხალხს ვუსურვო მშვიდობა, სტაბილურობა. დღევანდელი დღე უკავშირდება იმედს, განახლებას და ჩვენს რწმენას, უკეთესი მომავლის, უკეთესი ხვალინდელი დღის. მე მინდა ყველას გისურვოთ, რომ ხვალინდელი დღე იყოს მშვიდობის მომტანი, განახლების მომტანი.  ყველაფერი საუკეთესო მინდა გისურვოთ ყველას. ჩვენი ბრძენი პატრიარქის ყოველი სიტყვა არის ბრძნული და დასაფიქრებელი, როგორც ყოველთვის იყო ძალიან საინტერესო, ღრმა და ბრძნული,"- აღნიშნა ირაკლი ღარიბაშვილმა.

პრემიერ-მინისტრი ირაკლი ღარიბაშვილი მეუღლესთან ერთად სააღდგომო ლიტურგიას დაესწრო. საზეიმო წირვა სამების საკათედრო ტაძარში, სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ საპატრიარქო ტახტის მოსაყდრე, სენაკისა და ჩხოროწყუს მიტროპოლიტ შიო მუჯირთან, წმინდა სინოდის წევრებთან და მღვდელმსახურებთან ერთად აღავლინა.

საზეიმო წირვის დაწყებამდე, სამების საკათედრო ტაძარში შეკრებილმა მრევლმა საქართველოს პატრიარქის სააღდგომო ეპისტოლე მოისმინა.​სააღდგომო ლიტურგიაზე იმყოფებოდნენ პრეზიდენტი სალომე ზურაბიშვილი, პარლამენტის თავმჯდომარე შალვა პაპუაშვილი და აღმასრულებელი და საკანონმდებლო ხელისუფლების წარმომადგენლები.