უსუსურია, უნიათოა, სააკაშვილი გრძნობს, რომ გადავიდა მეორეხარისხოვან როლში და ცდილობს თავისი განცხადებებით თავი შეახსენოს ლევან ხაბეიშვილს მაინც - გიორგი ვოლსკი

საზღვრის უკანონოდ კვეთის საქმეზე ცოტა ხნის წინ დასრულდა მიხეილ სააკაშვილის პროცესი საქალაქო სასამართლოში. დღეს დასრულდა ბრალდების მხარის მტკიცებულებების გამოკვლევა.

პროკურორის განცხადებით, მიხეილ სააკაშვილმა კიდევ ერთხელ დაადასტურა, რომ საქართველოს ტერიტორიაზე უკანონოდ შემოვიდა.

სიტყვის უფლებით ისარგებლა თავად ექსპრეზიდენტმა, რომელმაც ვივა მედიდან ჩართვის დროს პოლიტიკური განცხადებები გააკეთა და თქვა, რომ საჭიროა აქციები და ერთიანობა. სააკაშვილის განცხადებები მმართველ გუნდში შეაფასეს.

უმრავლესობაში ამბობენ, რომ სააკაშვილი გრძნობს მეორე ხარისხოვან როლში გადავიდა და ცდილობს საკუთარი განცხადებებით თავი ლევან ხაბეიშვილს მაინც შეახსენოს.

"მიხეილ სააკაშვილი დარჩა აფსაიდში. მას ჰქონდა ერთი მთავარი როლი, რომ როგორმე მომაკვდავი ოპოზიციის ლიდერის როლი ეთამაშა და იქნებ მომკვდარიყო. გამოაცხადეს, რომ მას უკვე გვამის სუნი აუვიდა, რომ მას უკვე გვამური ლაქები აქვს, რომ მას უკვე დემენცია აქვს და ამითი უნდა აეტეხათ ამბავი, ვერ ატეხეს ამბავი, ვერ აფრიალეს მიშა სააკაშვილის გამოსახულებები. ახლა სალომე ზურაბიშვილი არის მთავარი აგენტი, რომელიც წინ წამოწიეს სააკაშვილის ჩასანაცვლებლად, მაგრამ ისიც არ გამოდის. უსუსურია, უნიათოა. აქედან გამომდინარე, სააკაშვილი გრძნობს, რომ გადავიდა მეორეხარისხოვან როლში და ცდილობს, რომ თავისი განცხადებებით თავი შეახსენოს ლევან ხაბეიშვილს მაინც", - აცხადებს საქართველოს პარლამენტის თავმჯდომარის პირველი მოადგილე გიორგი ვოლსკი.