უკრაინის საგარეო საქმეთა მინისტრმა მაკა ბოჭორიშვილს წერილით მიმართა: „ვაფასებთ საქართველოს მხარდაჭერას უკრაინის სუვერენიტეტისა და ტერიტორიული მთლიანობის მიმართ“

ვაფასებთ საქართველოს მხარდაჭერას უკრაინის სუვერენიტეტისა და ტერიტორიული მთლიანობის მიმართ, რუსეთის სრულმასშტაბიანი შეიარაღებული აგრესიის ფონზე, – ამის შესახებ უკრაინის საგარეო უწყების ხელმძღვანელი ანდრეი სიბიგა საქართველოს საგარეო საქმეთა მინისტრის, მაკა ბოჭორიშვილისადმი გაგზავნილ წერილში წერს, სადაც ქართველ კოლეგას მადლობას უხდის უკრაინის დამოუკიდებლობის დღის მილოცვისთვის.

უკრაინის საგარეო საქმეთა მინისტრი აღნიშნავს, რომ საქართველოსა და უკრაინას შეუძლიათ, ხელი შეუწყონ რეგიონში მშვიდობის დამყარებას.

„დარწმუნებული ვარ, ერთად შეგვიძლია, ხელი შევუწყოთ სამართლიანი და მდგრადი მშვიდობის დამყარებას შავი ზღვის რეგიონის საკეთილდღეოდ“, – ნათქვამია წერილში.

ასევე, წერილში საუბარია საერთაშორისო ფორმატებში თანამშრომლობაზეც.

„სუამ-ის ჩარჩოს ჩვენი მრავალმხრივი რეგიონული თანამშრომლობის ეფექტურ მექანიზმად მივიჩნევ და მოუთმენლად ველოდები სუამ-ის საგარეო საქმეთა მინისტრების საბჭოს შემდეგ შეხვედრას, რომელიც გაერო-ს გენერალური ასამბლეის მე-80 სესიის ფარგლებში გაიმართება“, – აღნიშნავს უკრაინის საგარეო უწყების ხელმძღვანელი.

ანდრეი სიბიგა ასევე საქართველოს საგარეო საქმეთა მინისტრს პროფესიულ საქმიანობაში წარმატებას უსურვებს, ხოლო ქართველ ხალხს – მშვიდობასა და კეთილდღეობას.

ინფორმაციას საქართველოს საგარეო საქმეთა სამინისტროს პრესსამსახური ავრცელებს.