ტყუილია, რომ ელის მარია სააკაშვილს მამასთან სტუმრობის საშუალება არ ეძლეოდა - პენიტენციური სამსახური

მედიასაშუალებების გარკვეული ნაწილის მიერ მიხეილ სააკაშვილთან და ნიკა გვარამიასთან დაკავშირებით არასწორი ინფორმაცია ვრცელდება - განცხადებას სპეციალური პენიტენციური სამსახური ავრცელებს.

აღნიშნავენ, რომ 19 მაისს მსჯავრდებულ მიხეილ სააკაშვილს გეგმურად დანიშნული მაღალ-ტექნოლოგიური კვლევა უტარდებოდა, რომლის დროსაც იგი პალატაში არ იმყოფებოდა, რაზეც ინფორმირებული იყო უფლებადამცველიც.

განცხადებაში წერია ისიც, რომ მოთხოვნიდან მეორე დღეს, ყოფილი პრეზიდენტი, შვილმა ელის მარია სააკაშვილმა დედასთან ერთად, სამოქალაქო სექტორის კლინიკაში მოინახულა. რაც შეეხება ნიკა გვარამიას, პენიტენციური უწყების განცხადებით, გვარამია ნომერ 12 პენიტენციურ დაწესებულებაში სამარტოო საკანში იმყოფება.

"მედიასაშუალებების გარკვეული ნაწილის მიერ ვრცელდება გადაუმოწმებელი და არასწორი ინფორმაცია, რამაც შესაძლოა, ხელი შეუწყოს რეალობისგან განსხვავებული საზოგადოებრივი აღქმის ჩამოყალიბებას.

19 მაისს მსჯავრდებულ მიხეილ სააკაშვილს გეგმიურად დანიშნული მაღალტექნოლოგიური კვლევა უტარდებოდა, რომლის დროსაც იგი პალატაში არ იმყოფებოდა. აღნიშნულის შესახებ ინფორმირებულობის მიუხედავად, ადვოკატი შოთა თუთბერიძე სამედიცინო გამოკვლევების დასრულებას არ დაელოდა, დატოვა კლინიკა და მედიასაშუალებებთან საუბრისას სპეციალური პენიტენციური სამსახური მისი დაცვის ქვეშ მყოფის მიმართ შეზღუდვების დაწესებაში უსაფუძვლოდ დაადანაშაულა.

ტყუილია განცხადება, თითქოს მსჯავრდებულ მ.სააკაშვილს, პენიტენციურ სისტემაში ყოფნის პერიოდში, შვილთან, ელის მარია სააკაშვილთან, შეხვედრის შესაძლებლობა არ ეძლეოდა. მსგავსი მოთხოვნით სპეციალური პენიტენციური სამსახურისთვის 2022 წლის 18 მაისამდე არავის მოუმართავს. ვიზიტის მოთხოვნიდან მეორე დღეს, 2022 წლის 19 მაისს, ელის მარია სააკაშვილმა, დედასთან ერთად, სამოქალაქო სექტორის კლინიკაში მოინახულა მიხეილ სააკაშვილი.

აქვე, გვსურს, გამოვეხმაუროთ ცალკეული მედიასაშუალების მხრიდან გავრცელებულ ინფორმაციას, თითქოს მსჯავრდებული ნ. გვარამია N12 პენიტენციურ დაწესებულებაში სამარტოო საკანში იმყოფება.

ხაზგასმით აღვნიშნავთ, რომ ნ. გვარამია, პენიტენციურ სისტემაში მოხვედრის დღიდან, ინფორმირებულია საკუთარი უფლებების შესახებ. იგი დაწესებულებაში სტანდარტულ საკანში, საკუთარი გადაწყვეტილების საფუძველზე იმყოფება მარტო, რაც დასტურდება შესაბამისი დოკუმენტაციით.

სპეციალური პენიტენციური სამსახური კიდევ ერთხელ მოუწოდებს ყველას, საზოგადოების შეცდომაში შეყვანის პრევენციის მიზნით, თავი შეიკავონ გადაუმოწმებელი, ცალმხრივი და არასწორი ინფორმაციის გავრცელებისგან." - ნათქვამია განცხადებაში.