ტრამპის ადმინისტრაცია სერიოზულად განიხილავს ირანის შეთავაზებას არაპირდაპირი ბირთვული მოლაპარაკებების შესახებ - „აქსიოსი“

ტრამპის ადმინისტრაცია სერიოზულად განიხილავს ირანის შეთავაზებას არაპირდაპირი ბირთვული მოლაპარაკებების შესახებ, – ამის შესახებ ინფორმაციას „აქსიოსი“ ავრცელებს.

გამოცემის ცნობით, თეთრი სახლში მიმდინარეობს დებატები მათ შორის, ვინც ფიქრობს, რომ შეთანხმება შესაძლებელია და მათ შორის, ვინც მოლაპარაკებებს დროის ხარჯვად აფასებს და მხარს უჭერს ირანის ბირთვული ობიექტების დაბომბვას.

ამავდროულად, პენტაგონი ახლო აღმოსავლეთში სამხედრო ძალებს აძლიერებს.

ტრამპის ინიციატივა ეხება პირდაპირი დიალოგის გამართვას ირანის ბირთვულ პროგრამასთან დაკავშირებით, თუმცა ირანი ამ ეტაპზე შუამავლის მეშვეობით არაპირდაპირი დიალოგის მომხრეა.

30 მარტს დონალდ ტრამპი ირანს დაბომბვით დაემუქრა, თუ ირანი ბირთვულ შეთანხმებაზე უარს იტყვის.

საპასუხოდ, ირანის სულიერმა ლიდერმა, აიათოლა ალი ხამენეიმ განაცხადა, რომ თავდასხმის შემთხვევაში ვაშინგტონი მძიმე საპასუხო დარტყმას მიიღებს.

აშშ ითხოვს, რომ ირანმა უარი თქვას ბირთვულ პროგრამაზე. თეირანში აცხადებენ, რომ ბირთვული ენერგია მხოლოდ სამოქალაქო მიზნებისთვის სჭირდებათ და ბირთვული იარაღის შექმნა არ აქვთ განზრახული.

2015 წელს დადებული ბირთვული შეთანხმება ირანსა და დასავლეთს შორის დონალდ ტრამპმა პრეზიდენტობის პირველ ვადაში დატოვა. მას შემდეგ ირანმა ურანის გამდიდრების დონე გაზარდა.