სუს-ის უფროსის თანამდებობაზე ანრი ოხანაშვილის კანდიდატურას პარლამენტში მიმდინარე კვირაში უყრიან კენჭს

სუს-ის უფროსის თანამდებობაზე ანრი ოხანაშვილის კანდიდატურას პარლამენტში კენჭს მიმდინარე კვირაში უყრიან, ინიციირებულია კანონპროექტი რეგიონული განვითარების სამინისტროს ცალკე ჩამოყალიბების შესახებ. „ქართულ ოცნებაში“ ამბობენ, რომ ცვლილებები ხელისუფლების ეფექტიანობას კიდევ უფრო გაზრდის.

სამთავრობო ცვლილებების შესახებ პრემიერ-მინისტრმა ირაკლი კობახიძემ განაცხადა. რეგიონული განვითარებისა და ინფრასტრუქტურის სამინისტრო იყოფა და რეგიონული განვითარების მინისტრის თანამდებობას გრიგოლ ლილუაშვილი დაიკავებს. სახელმწიფო უსაფრთხოების სამსახურის უფროსის თანამდებობაზე პარლამენტს ანრი ოხანაშვილის კანდიდატურა წარედგინება. იუსტიციის მინისტრის თანამდებობას კი პაატა სალია დაიკავებს.

სუს-ის უფროსი პარლამენტმა უნდა დაამტკიცოს. ანრი ოხანაშვილის კანდიდატურას კენჭს მიმდინარე კვირაში უყრიან. უკვე ინიციირებულია კანონპროექტი, რომელიც რეგიონული ინფრასტრუქტურის სამინისტროს ცალკე ჩამოყალიბებას გულისხმობს. ინფრასტრუქტურის მინისტრის პოსტზე ირაკლი ქარსელაძე რჩება.