შალვა პაპუაშვილი ადმინისტრაციულ სამართალდარღვევათა კოდექსში შესატან ცვლილებებზე: მნიშვნელოვანია, სანქცია იყოს იმდენად ადეკვატური, რომ ადამიანს არ უღირდეს სამართალდარღვევის ჩადენა

როდესაც ნორმები დარღვევების პრევენციას ვერ ახდენენ, ვცდილობთ, შესაბამისი ანალიზის საფუძველზე ისე მოვარგოთ ნორმა არსებულ გამოწვევებს, რომ შეასრულოს პრევენციული როლი, - განაცხადა საქართველოს პარლამენტის თავმჯდომარემ, შალვა პაპუაშვილმა.

მას კითხვა დაუსვეს ადმინისტრაციულ სამართალდაღრვევათა კოდექსში დაგეგმილ ცვლილებებთან დაკავშირებით.

„საქართველოს პარლამენტის ამოცანაა, დააკვირდეს როგორ მოქმედებს ესა თუ ის კანონი და შესაბამისად მოარგოს იმ გამოწვევებს, რომელიც ჩნდება ხოლმე კანონის იმპლემენტაციის დროს. ამ მხრივ, ადმინისტრაციულ სამართალდარღვევათა კოდექსი, რაც შეეხება საგზაო მოძრაობის ნაწილს, მნიშვნელოვანია ჩვენი მოსახლეობის უსაფრთხოებისთვის. როდესაც ნორმები ვერ ახდენენ პრევენციას დარღვევებისა, ვცდილობთ, შესაბამისი ანალიზის საფუძველზე ისე მოვარგოთ ნორმა არსებულ გამოწვევებს, რომ შეასრულოს პრევენციული როლი. სამართალდარღვევა არ უნდა ჩაიდინოს ადამიანმა და იმისთვის, რომ არ ჩაიდინოს, მნიშვნელოვანია, რომ პრევენცია, ანუ სანქცია სამართალდარღვევაზე იყოს იმდენად ადეკვატური, რომ ადამიანს არ უღირდეს ამ სამართალდარღვევის ჩადენა“, - აცხადებს პაპუაშვილი.

ავტოსაგზაო შემთხვევების პრევენციის მიზნით ადმინისტრაციულ სამართალდარღვევათა კოდექსში ცვლილებები შედის.