სამივეს წარმატებას ვუსურვებ და დარწმუნებული ვარ, რომ მხოლოდ და მხოლოდ წარმატებული და ეფექტური იქნება მათი მხრიდან ამ პოზიციების დაკავება - დავით მათიკაშვილი სამთავრობო ცვლილებებზე

საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი მთავრობაში საკადრო ცვლილებებს აფასებს. მისი განცხადებით, ეს ცვლილებები მთავრობის ეფექტურობას კიდევ უფრო გაზრდის.

„სამი მაღალი დონის პროფესიონალი სამი უწყების ხელმძღვანელად ხელისუფლების მართვის ეფექტურობის კიდევ უფრო გაზრდის მიზნით. რეგიონული მიმართულების ცალკე სამინისტრო შეიქმნება. სამივეს წარმატებას ვუსურვებ და დარწმუნებული ვარ, რომ მხოლოდ და მხოლოდ წარმატებული და ეფექტური იქნება მათი მხრიდან ამ პოზიციების დაკავება”, - განაცხადა დავით მათიკაშვილმა.

საქართველოს მთავრობაში საკადრო ცვლილებები განხორციელდება. საკადრო ცვლილებების შესახებ პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე ისაუბრა.

კერძოდ, პრემიერმა განაცხადა, რომ რეგიონული განვითარების სამინისტრო დამოუკიდებელ სამინისტროდ ჩამოყალიბდება და მინისტრის თანამდებობას გრიგოლ ლილუაშვილი დაიკავებს, ინფრასტრუქტურის მინისტრის თანამდებობაზე მუშაობას კი ირაკლი ქარსელაძე განაგრძობს.

პრემიერის თქმით, სახელმწიფო უსაფრთხოების სამსახურის თანამდებობაზე პარლამენტს ანრი ოხანაშვილის კანდიდატურა წარედგინება, იუსტიციის მინისტრის თანამდებობას კი პაატა სალია დაიკავებს.