საგამოძიებო კომისიით, სურთ ტორპედირება იმ პროცესის, რომელიც საქართველოს პროკურატურის და საერთაშორისო საგამოძიებო ორგანოების მიერ ხორციელდება - ქადაგიშვილი ქოლცენტრების საქმეზე

მმართველი გუნდი ფიქრობს, რომ ოპოზიციის მიერ ქოლცენტრების საქმეზე საგამოძიებო კომისიის შექმნა, მიზნად ისახავს ქართული და საერთაშორისო გამოძიებისთვის ხელის შეშლას. უმრავლესობაში ამბობენ, რომ მაშინ, როცა გამოძიება ჯერ კიდევ აქტიურ ფაზაშია, გარკვეულ პირებს სურთ, წინასწარ მოიპოვონ სრული წვდომა საგამოძიებო მასალებზე და მეორე მხრივ, ისრები სხვა მიმართულებით გადაიტანონ.

“საქართველოს პროკურატურამ მსოფლიოში ერთ-ერთმა პირველმა გაშიფრა ქოლცენტრების მუშაობის ანატომია და პასუხისგებაში მისცა ის ადამიანები, ვინც ამას ახორციელებდნენ. რატომ უნდათ ასეთ სიტუაციაში საგამოძიებო კომისიის შექმნა?! [ოპოზიციის] მთავარი მამოძრავებელი მგონი არის ის, რომ ერთი მხრივ, მოახდინონ გარკვეული ტორპედირება იმ საგამოძიებო პროცესის, რომელიც საქართველოს პროკურატურის და საერთაშორისო საგამოძიებო ორგანოების მიერ ხორციელდება და მეორე მხრივ, შესაძლო ფიგურანტების, რომლებიც მათ შორის ჟურნალისტური გამოძიების შედეგად იქნა გამოვლენილი, მოხდეს გარკლვეულწილად ან დაცვა, ან ისრების გადატანა, ან შესაძლოა მეტი ინფორმაციის მოპოვება, თუ რა მიმართულებით მიდის გამოძიება, მათ შორის საქართველოში გახმაურებული ახალი გვარების მიმართ." - აცხადებს უმრავლესობის დეპუტატი, ირაკლი ქადაგიშვილი.