„ქართულმა ოცნებამ“ იდეალურად წარმართა გასული 4 წელიწადი, პრაქტიკულად, გაანადგურა ოპოზიცია, ანუ „დიფ სთეითის“ აგენტურა, საზოგადოების უდიდეს ნაწილს გააგებინა სიმართლე, რომ „დიფ სთეითისგან“ მართული დასავლური სტრუქტურები ქვეყნის არევისა და რევოლუციის მოწყობის გამუდმებული მცდელობით არიან დაკავებული - ზაზა შათირიშვილი

აშკარაა, რომ „დიფ სთეითი“ არც ფსევდოლიბერალური იდეოლოგიის დათმობას აპირებს და მასთან ბრძოლაც მხოლოდ მოჩვენებითია,  -  წერს ფილოსოფოსი ზაზა შათირიშვილი.

მისი განცხადებით, აშშ-ის ახალი ადმინისტრაცია აქცენტს მხოლოდ გენდერის თემაზე აკეთებს, თუმცა, არასდროს დაპირისპირებიან ერთნაირსქესიანთა ქორწინებას და სხვა მოვლენებს, რომლებიც სამყაროს ფსევდოლიბერალურმა იდეოლოგიამ მოახვია თავს.

შათირიშვილის თქმით, ტრამპის ადმინისტრაცია რა პრობლემებზეც საუბრობს, იმაზე საქართველოს ხელისუფლება ჯერ კიდევ სამი წლის წინ ალაპარაკდა.

„ახალი ადმინისტრაცია აქცენტს მხოლოდ გენდერის თემაზე და ტრანსგენდერებზე აკეთებს, რაც პრობლემის მხოლოდ მცირე ნაწილია. ტრამპმა და მისმა ადმინისტრაციამ აღიარეს ბანალური ჭეშმარიტება, რომ „კაცი კაცია და ქალი ქალი“, თუმცა, ისინი არცერთხელ არ დაპირისპირებიან ერთნაირსქესიანთა ქორწინებას და სხვა მოვლენებს, რომლებიც სამყაროს ფსევდოლიბერალურმა იდეოლოგიამ მოახვია თავს. გენდერისა და ტრანსგენდერების თემასაც „დიფ სთეითი“ ევროპაში ინახავს და კიდევ უფრო აქტიურად აღვივებს.

პრობლემებზე, რომლებთან დაკავშირებითაც ტრამპის ადმინისტრაცია საუბრობს, საქართველოს ხელისუფლება ჯერ კიდევ 3 წლის წინ ალაპარაკდა, რაც მათთვის, ობიექტურად, საინტერესო უნდა ყოფილიყო. თუმცა, ვხედავთ, რომ ახალი ადმინისტრაცია საქართველოსთან დაკავშირებით სრულ დუმილს ინარჩუნებს. ამ დუმილს ერთადერთი ახსნა აქვს - „დიფ სთეითმა“ არ იცის, რა უნდა გაკეთოს საქართველოსთან მიმართებით,“ -  აღნიშნულია შათირიშვილის წერილში.

მისი განცხადებით, მმართველმა გუნდმა იდეალურად წარმართა გასული ოთხი წელი და პრაქტიკულად, „დიფ სთეითის“ აგენტურა ოპოზიციის სახით გაანადგურა, ასევე საზოგადოების უდიდეს ნაწილს გააგებინა სიმართლე, რომ დასავლური სტრუქტურები, რომლებიც „დიფ სთეითისგან იმართებიან, ქვეყნის არევის გამუდმებული მცდელობით არიან დაკავებულნი.

„„ქართულმა ოცნებამ“ იდეალურად წარმართა გასული 4 წელიწადი, პრაქტიკულად, გაანადგურა ოპოზიცია, ანუ „დიფ სთეითის“ აგენტურა, საზოგადოების უდიდეს ნაწილს გააგებინა სიმართლე, რომ „დიფ სთეითისგან“ მართული დასავლური სტრუქტურები არა საქართველოს დახმარებით, არამედ ქვეყნის არევისა და რევოლუციის მოწყობის გამუდმებული მცდელობით არიან დაკავებული. ახალმა ადმინისტრაციამ „ქართულ ოცნებას“ ხელი რომ გაუწოდოს, აგენტურა საბოლოოდ უნდა გაანადგუროს, რასაც, ბუნებრივია, „დიფ სთეითი“ არ დაუშვებს. ამავდროულად, „ქართული ოცნება“ ახლა იმდენად არის მოძლიერებული, რომ მასზე თავდასხმაც დღეს სრულიად კონტრპროდუქტიული იქნებოდა. სწორედ ამიტომ რჩება ახალი ადმინისტრაცია დუმილის რეჟიმში.

თუმცა, „ქართული ოცნება“ არ უნდა დაელოდოს იმას, რასაც ამერიკაში ელოდებიან, კერძოდ, „დიფ სთეითის“ რებრენდინგს, რომელსაც დაახლოებით ერთი წელიწადი დასჭირდება. ამასაც მარტივი ახსნა აქვს - როგორც კი „დიფ სთეითის“ რებრენდინგი დასრულდება, ის საქართველოს გაძლიერებული ტრამპის ხელით შემოუბრუნდება და აგენტურით მის ჩანაცვლებას კიდევ ერთხელ შეეცდება. ამიტომ, „ქართულმა ოცნებამ“ საზოგადოება ახალი ადმინისტრაციის ხელით „დიფ სთეითის“ ახალი შეტევისთვის წინასწარ უნდა შეამზადოს.

ერთადერთი, ვისაც ამ რთულ რეალობაში „ქართული ოცნება“ დღემდე ეყრდნობოდა და მომავალშიც უნდა დაეყრდნოს, ქართველი ხალხია, რომელსაც გასული 35 წლის მანძილზე უდიდესი გამოცდილება და სიბრძნე დაუგროვდა. ამიტომ, აშშ-ში მიმდინარე მოვლენების შესახებ საზოგადოების სრულად ინფორმირებას ალტერნატივა არა აქვს.“ -  წერს ზაზა შათირიშვილი.