„პროპაგანდისტულმა მესიჯებმა, რომ 20 იანვრის შემდეგ აშშ-სთან ურთიერთობები თვისებრივად გაუმჯობესებული ექნებოდათ, კრახი განიცადა“ - გრიგოლ გეგელია

ზაზა შათირიშვილი ვრცელი წერილი ოპოზიციის წარმომადგენლებმა შეაფასეს. ფილოსოფოსი აცხადებს, რომ აშშ-ის ახალი ადმინისტრაცია საქართველოსთან დაკავშირებით სრულ დუმილს ინარჩუნებს, ამ დუმილს კი მისივე თქმით ერთადერთი ახსნა აქვს - "დიფ სთეითმა" არ იცის, რა უნდა გააკეთოს საქართველოსთან მიმართებით.

"ერთიანი ნაციონალური მოძრაობის" თავმჯდომარის, თინა ბოკუჩავას განცხადებით, "ქართული ოცნება" შეშფოთებულია, რადგან ტრამპის ადმინისტრაციამ აშშ-ის სასანქციო პოლიტიკა არ შეცვალა.

"ძალიან შეშფოთებულები არიან იმასთან დაკავშირებით, რომ [ტრამპის ადმინისტრაციამ] არც შეცვალა და არც შეარბილა თავისი სასანქციო პოლიტიკა. მთელმა თავისუფალმა სამყარომ, განსაკუთრებით, აშშ-მა და, კერძოდ, ტრამპის ადმინისტრაციამ ზედმიწევნით იცის, რომ დღეს, სამწუხაროდ, პროდასავლელ ქართველს ხალხს ჰყავს არალეგიტიმური ხელისუფლება," - განაცხადა თინა ბოკუჩავამ.

კოალიცია "ძლიერი საქართველოს" წევრის, გრიგოლ გეგელიას განცხადებით, რადგან "ქართული ოცნებისა" და აშშ-ის ურთიერთობა ახალი ადმინისტრაციის პირობებში არ გაუმჯობესებულა, მათ ზაზა შათირიშვილის "გამოგორება" მოუხდათ.

"თურმე, 20 იანვრის შემდეგ პერიოდში მათ ექნებოდათ თვისებრივად გაუმჯობესებული ურთიერთობები აშშ-სთან. ამ პროპაგანდისტულმა მესიჯებმა განიცადა კრახი და მათ მოუხდათ, რომ გამოეგორებინათ ზაზა შათირიშვილი," - აცხადებს გრიგოლ გეგელია.