"მხარდაჭერა ვერ შედგება" - პარტია „საქართველოსთვის“ პასუხი მიხეილ სააკაშვილს

პარტია „საქართველოსთვის" დეპუტატები მიხეილ სააკაშვილის იმ ინიციატივის მხარდაჭერას არ აპირებენ, რომელიც ელექტროენერგიის გაძვირების საკითხზე პარლამენტში დროებითი საგამოძიებო კომისიის შექმნას ითვალისწინებს, ამის შესახებ მიხეილ დაუშვილმა ჟურნალისტებს განუცხადა.

„პირველ რიგში, ორი მთავარი საკითხია, რის გამოც მხარდაჭერა ვერ შედგება. პირველია, ჩამოყალიბდნენ თუ როგორ მოქმედებენ სახელმწიფო ინსპექტორის აპარატთან დაკავშირებით, ჰქონდათ ინიციატივა, მოდით, ეს ორგანო საგამოძიებო კომისიით ჩავანაცვლოთ, რომელიც უშუალოდ მიხეილ სააკაშვილთან იქნებოდა დაკავშირებული.

ახლა პოზიცია შეცვალეს და სხვა კომისიაზე დაიწყეს საუბარი. ამასთან, მნიშვნელოვანია დავინახოთ, რასაც ეს ხალხი აკეთებს, აკეთებს არა მხოლოდ საკუთარი ვიწრო პარტიული ინტერესების გამო, არამედ სახელმწიფოსა და მოქალაქეთა ინტერესებიდან გამომდინარე. პირველ რიგში უნდა ჩამოყალიბდნენ, რა სტრატეგია და რა ხაზი აქვთ", - განაცხადა მიხეილ დაუშვილმა.

მანამდე პარტია „საქართველოს“ დეპუტატებმა განაცხადეს, რომ სააკაშვილთან დაკავშირებით, საგამოძიებო კომისიის შექმნის შესახებ ინიციატივას მხარს არ უჭერენ.

საქართველოს მესამე პრეზიდენტი მიხეილ სააკაშვილი პარლამენტში ელექტროენერგიის გაძვირებასთან დაკავშირებით, საგამოძიებო კომისიის შექმნის ინიციატივით გამოდის. მიხეილ სააკაშვილი „ნაციონალურ მოძრაობას“ სთხოვს, ამ თემაზე კონსულტაციები დაიწყოს. ამასთან, სააკაშვილმა მიმართა გიორგი გახარიას პარტიის წევრებს კითხვით,  შეუერთდებიან თუ არა აღნიშნულ იდეას.