ლევან მახაშვილი: ჯერჯერობით, რასაც ვაკვირდებით ისაა, რომ „დიფ სთეითი“ ახალ ბუდეს იწყობს ევროპის კონტინენტზე და აქედან ცდილობს შეტევას. საქმით გამოჩნდება რამდენად შეძლო ტრამპის ადმინისტრაციამ არაფორმალური გავლენების დამარცხება

ჯერჯერობით, რასაც ვაკვირდებით არის ის, რომ ახალ ბუდეს იწყობენ ევროპის კონტინენტზე და აქედან ცდილობენ ახალი ენერგიით შეტევას, არა მხოლოდ საქართველოზე, - განაცხადა ევროპასთან ინტეგრაციის საპარლამენტო კომიტეტის თავმჯდომარემ ლევან მახაშვილმა „დიფ სთეითთან“ დაკავშირებით.

მისი თქმით, მმართველი გუნდი ამერიკის შეერთებული შტატების ახალ ადმინისტრაციასთან ურთიერთობის გადატვირთვისთვის მზად არის და კონკრეტულ ნაბიჯებს ახლა შტატებისგან ელოდება.

ლევან მახაშვილის განცხადებით, სწორედ საქართველო-აშშ-ს ურთიერთობებიდან გამოჩნდება, რამდენად შეძლო ტრამპის ადმინისტრაციამ „დიფ სთეითის“ შესუსტება.

„რა თქმა უნდა ვაკვირდებით იმას თუ რა გადაადგილებას, რა რებრენდინგს აქვს ადგილი არაფორმალურ გავლენებთან, ე.წ. „დიფ სთეითთან“, რასაც ამერიკის პრეზიდენტი უწოდებს. ჯერჯერობით, რასაც ვაკვირდებით არის ის, რომ ახალ ბუდეს იწყობენ ევროპის კონტინენტზე და აქედან ცდილობენ ახალი ენერგიით შეტევას, არა მხოლოდ საქართველოზე. საქართველო არ არის ერთადერთი სამიზნე რა თქმა უნდა. ამას უნდა დავაკვირდეთ გრძელ ვადაში. იმიტომ, რომ არც ჩვენ ვართ იმ ასაკში და არც სახელმწიფო არის განვითარების იმ ეტაპზე, რომ ცარიელი სიტყვებით მიიღოს გადაწყვეტილებები. საქმით გამოჩნდება რამდენად შეძლო ახალმა ადმინისტრაციამ არაფორმალური გავლენების დამარცხება და საქმით გამოჩნდება რამდენად ამას ექნება შესაბამისი გავლენა საქართველო-ამერიკის შეერთებული შტატების ურთიერთობაზე“, - განაცხადა ლევან მახაშვილმა.