ხაბეიშვილს უნდა დავეთანხმოთ, რომელმაც თქვა, ერთმანეთს ვჭამთ და რომელ კოალიციურ ხელისუფლებაზეა საუბარიო, ამბავი დასრულდა, რასაც აღქმებით ქვეყნების მართვა ჰქვია - მაჭარაშვილი

სულ ვსაუბრობდით, რომ „ნაციონალურ მოძრაობაში“ და მის ანასხლეტებში გაერთიანების, ერთიანი სიის და მით უმეტეს, კოალიციური ხელისუფლების არანაირი რესურსი არ იყო, – ამის შესახებ „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.

„დღეს უკვე ხაბეიშვილი დაგვეთანხმა და თქვა, ერთმანეთს ვჭამთ და რომელ კოალიციურ ხელისუფლებაზეა საუბარიო. ამ შემთხვევაში, როგორი გასაკვირიც არ უნდა იყოს, ხაბეიშვილს უნდა დავეთანხმოთ – რა კოალიციურ ხელისუფლებაზეა საუბარი, ერთ განცხადებასა და მიდგომაზე ვერ თანხმდებიან. ეს ის მოცემულობაა, რამაც პრაქტიკულად, კოლექტიური „ნაცმოძრაობა“ შეჭამა. შესაბამისად, ამბავი დასრულდა, რასაც აღქმებით ქვეყნების მართვა ჰქვია. ვინ პენსიაზე წავა, ვინ ლექციებს წაიკითხავს და ვინ უცხოეთში, აგენტურაში, ეს მათი გადასაწყვეტია, მაგრამ ამას დროებითი საგამოძიებო კომისიის მხრიდან რეჟიმის დასკვნა წამოეწევათ. კარგი პროცესი იქნება, როცა ქართულ პოლიტიკას „ნაცმოძრაობა“ ჩამოსცილდება. ეს ველი ჯანსაღი ძალებით შეივსება“,- განაცხადა მაჭარაშვილმა.