ირაკლი ზარქუა „ტვ პირველზე“: ალექსანდრე ამისულაშვილს, იმიტომ, რომ ჩემი დის მეუღლეა სულ ზარქუას სიძე ეძახეს

მინდა გამოვეხმაურო „ტვ პირველის“ და მელაძის იმ უმსგავსო ქმედებას ჩემი ოჯახის წევრების მიმართ, რასაც წინა კვირას ჰქონდა ადგილი. ჩემი დის ოჯახს მიუცვივდნენ ჯერ ლიფტში, მანქანაში ჩაუხტნენ, შემდეგ სახლში მიუცვივდნენ და ადამიანს, იმიტომ, რომ ჩემი დის მეუღლეა, სულ ზარქუას სიძე ეძახეს, რათა საზოგადოებაში გაეჩინათ განცდა, რომ თურმე ზარქუა ლობირებს რაღაც თემებს - ამის შესახებ საპარლამენტო უმრავლესობის წევრმა, ირაკლი ზარქუამ პარლამენტის პლენარულ სხდომაზე განაცხადა.

როგორც ზარქუამ აღნიშნა, უსაფუძვლოდ დააბრალო ადამიანს იმიტომ, რომ შავი პიარი აუგორო დეპუტატს, ამით არაფერი დაუშავდება. „ალექსანდრე ამისულაშვილი, რომელმაც მთელი თავისი ცხოვრება ღირსეულად ატარა ეროვნული ნაკრების მაისური, ეროვნული დროშა, ყველა იცნობს, ვინ რას წარმოადგენს. ეტყობა ძველი რეჟიმის დროიდან ჰგონიათ რომ ეს ასე ხდება. ადამიანი თავისი შრომით, ჯაფით, კაპიტალით, სამშენებლო თემებშია და რადგან ზარქუას სიძეა, თურმე უნდა გახდეს ბულინგის მსხვერპლი.

ეს არის თქვენი სტანდარტი. გეგონათ, თავის მართლების რეჟიმში გადავიდოდი. არა ბატონებო, პირიქით, მე მოვუწოდებ ყველა ჩემს ახლობელს, მეგობარს, უბნელს, ჩემს თბილისელებს, ჩემს წალენჯიხელებს, ვისაც გაქვთ კაპიტალი, გამოცდილება, შესაძლებლობა რომ ღია, გამჭვირვალე, ტენდერებში მიიღოთ მონაწილეობა თამამად გააკეთეთ ეს, იმიტომ, რომ მეტი სკოლა და ბაღი უნდა აშენდეს, მეტი სპორტკომპლექსი, ღირსეულად და ხარისხიანად. რაც შეეხება ბატონ მელაძეს და მის ამ ქმედებებს, ამას მიჩვეული ვართ, დაწყებული მისი ყალბი ინტონაციებით და მანჭვა-გრეხით პროლოგში, ეს უკვე სასაცილოა.

მესმის, ეს არ არის მათი ბრალი, იმიტომ, რომ სხვანაირად რომ ყოფილიყო ისე კი არ იტყოდნენ სიუჟეტში - სავარაუდოდ ზარქუა, შესაძლებელია ზარქუა, როგორც ამბობენ ზარქუა - მტკიცებით ფორმაში იტყოდნენ, მაგრამ მტკიცებით ფორმაში ვერ ამბობს, რადგან ზუსტად იცის, რომ სავარაუდოდ სასამართლო გადაწყვეტილებით მოუწევს მრავალათასიანი ხელფასის წაგება, რომელსაც იღებს. მე ერთი თეთრი არ მინდა, მე მინდა მის თანამშრომლებს, უფასოდ რომ ამუშავებენ - მძღოლებს, ჟურნალისტებს, ოპერატორებს გადაუხადონ, მათგან ვიცი ეს ინფორმაცია. 25 000 ლარი ხელფასი რომ აქვს ბატონ მელაძეს, როგორც ამბობენ, ამის დათმობა მოუწევთ, ამიტომ ვერ ამბობენ მტკიცებით ფორმაში“ - განაცხადა ირაკლი ზარქუამ.