დაუშვებელია მოსახლეობის გასამართლება ან დაშინება, რა დანაშაულებრივი რეჟიმის ამომრჩევლებიც არ უნდა იყვნენ - არჩილ გორდულაძე

დაუშვებელია მოსახლეობის გასამართლება ან დაშინება, რა დანაშაულებრივი რეჟიმის ამომრჩევლებიც არ უნდა იყვნენ, - განაცხადა საპარლამენტო ფრაქცია „ქართული ოცნების“ თავმჯდომარის პირველმა მოადგილე არჩილ გორდულაძემ.

უმრავლესობის დეპუტატი გამოეხმაურა საზოგადოებრივი მოძრაობა „ერთიანი ნეიტრალური საქართველოს“ განცხადებას, რომლის თანახმად, არჩევნების შემდეგ, „ნაციონალური მოძრაობის“ ანტიკონსტიტუციურად გამოცხადების პარალელურად, მათ ამომრჩევლებსაც უნდა დაეკისროთ პასუხისმგებლობა.

„თითოეულ ამომრჩეველს კარგად უნდა ესმოდეს რამხელა პასუხისმგებლობა აქვს. კარგად უნდა გვესმოდეს რამხელა პასუხისმგებლობა გვაკისრია. ძალიან სამწუხაროა როდესაც ქართველი ამომრჩევლის ნაწილი მხარ უჭერს ისეთ აგენტურასა და მოღალატეობრივ ძალას, როგორიცაა მაგალითად ხაზარაძის „ლელო“, ან გიორგი გახარიას ე.წ. პარტია. ყველამ უნდა გავითავისოთ, რომ როგორც ხაზარაძე, ისე გახარია ზუსტად ისეთივე დამნაშავეები არიან, როგორც კოლექტიურ „ნაცმოძრაობაში“ შემავალი გვარამია, მელია, მიხეილ სააკაშვილი და სხვა დანარჩენები. შესაბამისად, როდესაც ქართველი ამომრჩეველი მიიღებს გადაწყვეტილებას, უნდა ვთხოვოთ, კარგად შეხედოს ფაქტებს და მხოლოდ ამაზე დაყრდნობით მიიღოს გადაწყვეტილება“, - განაცხადა გორდულაძემ.