ბექა ძამაშვილი: ხაზარაძე-ჯაფარიძის პარტნიორის მხრიდან თანხის გადახდა მკაფიო დასტურია, რომ ვაშინგტონის არბიტრაჟის გადაწყვეტილებას ეთანხმებიან, თანხა უკვე აისახა ბიუჯეტში

ხაზარაძე-ჯაფარიძის პარტნიორის მხრიდან ვაშინგტონის არბიტრაჟის გადაწყვეტილების შესრულება, დაკისრებული თანხის გადახდა არის მკაფიო დასტური, რომ ისინი ეთანხმებიან არბიტრაჟის გადაწყვეტილებას. ანუ, ეთანხმებიან, რომ ანაკლიის პორტის ვერგანხორციელება მთლიანად იყო მათი ბრალეულობა, – ამის შესახებ იუსტიციის მინისტრის მოადგილემ, ბექა ძამაშვილმა განაცხადა.

ძამაშვილს კითხვა დაუსვეს გავრცელებულ ინფორმაციაზე, რომლის მიხედვითაც, ხაზარაძისა და ჯაფარიძის ჰოლანდიელმა პარტნიორმა, ბობ მეიერმა ანაკლიის პორტის საქმის ფარგლებში ვაშინგტონის არბიტრაჟის მიერ დაკისრებული 6,5 მილიონი აშშ დოლარი გადაიხადა.

„სახელმწიფოს რაიმე კუთხით მათთვის ხელი არ შეუშლია, ფაქტობრივად, მათ ამ პროცედურული მოქმედებით, ეს ყველაფერი თვითონ დაადასტურეს. ადამიანმა როდესაც იცის, რომ მართალია, ყველა შესაძლო სამართლებრივ მექანიზმს იყენებს. აუცილებლად გაასაჩივრებდა და ბოლომდე შეეცდებოდა საკუთარი სიმართლის დაცვას. არბიტრაჟის გადაწყვეტილების მყისიერად შესრულება ადასტურებს, რომ თავიდანვე იცოდნენ, ამ საქმეში სახელმწიფო იყო მართალი, უბრალოდ, ეს საქმეები გარკვეული პოლიტიკური დივიდენდების მიღების მიზნით გამოიყენეს. ორ სხვადასხვა არბიტრაჟში შეიტანეს საქმე. ნიშანდობლივია, რომ გასულ წელს, როდესაც პარიზის არბიტრაჟმა მიიღო ანაკლიის კონსორციუმის წინააღმდეგ გადაწყვეტილება, მაშინაც არ გაასაჩივრეს. ერთობლიობაში ყველაფერი აჩვენებს, რომ მათ ეს საქმეები უბრალოდ პოლიტიკური ნიშნით ჭირდებოდათ. იცოდნენ, სახელმწიფო მართალი იყო და ამ პროცედურული მოქმედებით, რაც დაკისრებული თანხის გადახდაში გამოიხატა, ყველაფერი მკაფიოდ დადასტურდა“, – განაცხადა ბექა ძამაშვილმა.

ძამაშვილის ინფორმაციით, ბობ მეიერმა დაკისრებული თანხა რამდენიმე დღის წინ გადაიხადა.

„რამდენიმე დღის წინ გადაიხადა და თანხა უკვე ასახულია ბიუჯეტში. შესაბამისად, დღეს თამამად შეგვიძლია ამაზე საუბარი“, – განაცხადა ძამაშვილმა.

ბექა ძამაშვილმა დავის წარმოებისას ქართული სახელმწიფოს მიერ გაწეულ ხარჯებთან დაკავშირებითაც ისაუბრა.

„ყურადღება უნდა გავამახვილოთ ჩვენი სახელმწიფოს მიერ გაწეულ ხარჯებზე. მათი პოლიტიკური პარტია და ტელევიზიები ნიშნისმოგებით მიანიშნებენ ხოლმე, რომ რამდენიმე ათეული მილიონი დახარჯა სახელმწიფომ ამ დავის წარმოების დროს. ბუნებრივია, როდესაც სახელმწიფოს ედავები ოთხ მილიარდზე მეტი ზიანის ანაზღაურებას, სახელმწიფო ვალდებულია, თავი დაიცვას და ამისთვის შესაბამისი ხარჯები გაწიოს. ფაქტობრივად, შეიძლება ითქვას, რომ რამდენიმე ათეული მილიონი, რომელიც სახელმწიფოს დასჭირდა დავის საწარმოებლად, მათ კისერზეა, რადგან დავის პროცესში ბევრი შეთავაზება გავუკეთეთ, რათა ეს ხარჯები ყველასათვის დაზოგილი ყოფილიყო. შევთავაზეთ, მხოლოდ ერთ არბიტრაჟში წარმართულიყო დავა, მაგრამ მათ უნდოდათ პარალელურად ამ დავების წარმოება. აქაც ძალიან მკაფიოა, რა იყო მათი მიზანი – მაქსიმალური ზიანი მიეყენებინათ სახელმწიფოსთვის. ახლა, როდესაც ყველაფერი წააგეს, ერთადერთი ისღა დარჩენიათ, ნიშნის მოგებით მიუთითონ, რაღაც თანხა მაინც დაგახარჯინეთ ბიუჯეტიდანო. მათ პარალელურად დაიწყეს ორი დავა ვაშინგტონის და პარიზის არბიტრაჟებში. მთლიანად ხარჯები იყო 63 მლნ ლარის ოდენობით და ამ ხარჯებით მათ სახელმწიფო ბიუჯეტს მიაყენეს ზარალი. გარდა იმისა, რომ პორტი ვერ ააშენეს, წლები დააკარგვინეს. ამდენი წელი ცდილობდნენ, სიცრუე შემოეტანათ პოლიტიკურ ველში. ამ ყველაფრის წაგების შემდეგ, ერთადერთი, რაზეც ახლა მიუთითებენ, არის ის, რომ სახელმწიფო ბიუჯეტს მილიონობით ზარალი მიაყენეს და თითქოს ეს უხარიათ“, – განაცხადა ბექა ძამაშვილმა.

ცნობისთვის, 31 ივლისს საქართველოს იუსტიციის სამინისტრომ გაავრცელა ინფორმაცია, რომ მამუკა ხაზარაძემ და ბადრი ჯაფარიძემ ანაკლიის პორტის საქმეზე დავა ვაშინგტონის არბიტრაჟშიც წააგეს. უწყების ცნობით, აღნიშნული დავის ფარგლებში ხაზარაძისა და ჯაფარიძის ჰოლანდიელი პარტნიორი ბობ მეიერი ითხოვდა 64 მილიონი აშშ დოლარის გადახდას, თუმცა არბიტრაჟმა მისი ყველა მოთხოვნა უარყო და მას თავად დააკისრა საქართველოს მთავრობის სასარგებლოდ 6,5 მილიონი აშშ დოლარის გადახდის ვალდებულება.