„არის გარკვეული სახის მოსაზრებები, რომ შეიძლება რომელიმე პარტიამ გადაწყვიტოს სხვაგვარად, თუმცა ჩვენ გვჯერა, რომ ეს იქნება დიდი შეცდომა“ - გიორგი კაპანაძე თვითმმართველობის არჩევნებში მონაწილეობაზე

რა გახდა ოპოზიციაში ღია დაპირისპირების მიზეზი - თავად ხელისუფლების ოპონენტები შეუთანხმებლობას არაერთ საკითხს უკავშირებენ - მათ შორის ერთ-ერთი, ადგილობრივი თვითმმართველობის არჩევნებთან დაკავშირებით პოზიციების ბუნდოვანებაა.

პარტიის "ერთიანობა - ნაციონალური მოძრაობის" პოლიტიკური საბჭოს წევრი, გიორგი კაპანაძე ერთიანობის მნიშვნელობაზე ამახვილებს ყურადღებას.

"იმ საკითხებზე, რომელიც არის ჩვენი საზოგადოების დაკვეთა, ერთიანობა არის ძალიან მნიშვნელოვანი. მაგრამ, თუ რომელიმე კონკრეტული პოლიტიკური პარტია ამ დაკვეთას არ შეასრულებს, პასუხისმგებლობაც იქნება მასზე. არის გარკვეული სახის მოსაზრებები იმასთან დაკავშირებით, რომ შეიძლება რომელიმე კონკრეტულმა პარტიამ გადაწყვიტოს სხვაგვარად, თუმცა ჩვენ გვჯერა, რომ ეს იქნება დიდი შეცდომა, ეს იქნება ჩვენი საზოგადოებისთვის ზურგის შექცევა," - აცხადებს გიორგი კაპანაძე.

"კოალიცია ცვლილებისთვის - გვარამია, მელია, გირჩი, დროა", გიორგი იმედაშვილი აცხადებს, რომ მნიშვნელოვანია, ფუნდამენტურ საკითხებთან დაკავშირებით იყოს ერთობა.

"არიან ადამიანები, რომლებიც ფიქრობენ, რომ ზოგიერთ საკითხზე მათი მხრიდან პოზიციის გაჟღერება შეიძლება იყოს ცუდი ახლა. მე ვფიქრობ, ეს პოლიტიკური შეცდომაა. ვფიქრობ, არის საკითხები, სადაც არის ძალიან მნიშვნელოვანია ერთობა და ვფიქრობ არის საკითხები, რომელიც რა თქმა უნდა, არის აზრთა სხვადასხვაობა. ყველა საკითხზე ერთიანობა არ არის საჭირო, არის საჭირო ფუნდამენტურ საკითხებზე იყოს ერთიანობა, როგორიც არის ართანამშრომლობა ქართულ ოცნებასთან, როგორიც არის მათი არალეგიტიმაციის გზის გაგრძელება," - აცხადებს გიორგი იმედაშვილი.

შეგახსენებთ, სალომე ზურაბიშვილმა გუშინ საპროტესტო აქციის შემდეგ, ოპოზიციის ცალკეულ წარმომადგენლებთან პირველი შეხვედრა გამართა.

მიწვევის მიუხედავად, მოლაპარაკებაზე მხოლოდ 6 ოპოზიციონერი მივიდა. მათ შორის პირველად, არ ყოფილა "ნაციონალური მოძრაობა," რომელიც ბოლო პერიოდში ზურაბიშვილის მთავარ მოწინააღმდეგედ იქცა. შეხვედრაზე არ მივიდნენ არც ზურაბ გირჩი ჯაფარიძე და ნიკა გვარამია.