უკრაინის ომბუდსმენი: 700 000-ზე მეტი უკრაინის მოქალაქე რუსეთშია დეპორტირებული

უმაღლესი რადას ადამიანის უფლებათა კომისარმა, ლუდმილა დენისოვამ განაცხადა, რომ დონეცკისა და ლუგანსკის ოლქებიდან რუსეთში 700 000-ზე მეტი მშვიდობიანი მოქალაქეა დეპორტირებული.

„რუსეთის ფედერაციის მონაცემებით, 700 000-ზე მეტი ჩვენი მოქალაქე დეპორტირებულია რუსეთში, მათი შეფასებით, აქედან 130 000-ზე მეტი ბავშვი“, - განაცხადა დენისოვამ.

მისი თქმით, ყოველდღიურად 20 000-მდე ადამიანი დეპორტირებულია რუსეთში, უკრაინელები კი რუსეთის ფედერაციის 35 რეგიონში არიან. ომბუდსმენმა დასძინა, რომ ეს დაადასტურა რუსეთში ადამიანის უფლებათა კომისარმა, ტატიანა მოსკალკოვამ.

„ამჟამად დონეცკის ოლქში არის ფილტრაციის ბანაკი, სადაც 10 000-ზე მეტი ჩვენი მოქალაქე იმყოფება. ეს არის ბანაკები, რომლებშიც ისინი აიძულებენ ჩვენს მოქალაქეებს ითანამშრომლონ. ისინი არკვევენ, არიან თუ არა სამართალდამცავების ნაცნობები, შემდეგ კი აპატიმრებენ და აწამებენ“, - დასძინა ომბუდსმენმა.

ომბუდსმენი რუსეთის მიერ უკრაინელების იძულებით დეპორტაციას სამხედრო დანაშაულს უწოდებს. „ეს არის ჟენევის კონვენციის დარღვევა სამოქალაქო უფლებების დაცვის შესახებ“, - განაცხადა მან.