უკრაინამ ბრძოლის ველზე ცოცხალი ძალის ნაკლებობის პრობლემა ნაწილობრივ აღმოფხვრა - ევროპაში NATO-ს გაერთიანებული ძალის მეთაური

აშშ-ის კონგრესის სენატში გამართულ მოსმენაზე ევროპაში ნატოს გაერთიანებული ძალის მეთაურმა, გენერალმა კრისტოფერ კავოლიმ განაცხადა, რომ უკრაინამ ბრძოლის ველზე ცოცხალი ძალის ნაკლებობის პრობლემა ნაწილობრივ აღმოფხვრა.

მისი თქმით, უკრაინის შეიარაღებული ძალების რიცხოვნობა მნიშვნელოვნად არის გაზრდილი, რასაც მეტწილად სამობილიზაციო ასაკის შემცირებამ შეუწყო ხელი.

„უკრაინას დღეისათვის საკმარისად მყარი თავდაცვითი პოზიციები აქვს. ისინი კარგად არიან გამაგრებულნი და, როგორც ჩანს, ნაწილობრივ მოაგვარეს ბრძოლის ველზე ცოცხალი ძალის ნაკლებობის პრობლემაც. ეს პრობლემა საკმაოდ მწვავედ იდგა შემოდგომაზე, მაგრამ მას შემდეგ უკრაინამ გაზარდა სამობილიზაციო რეზერვი. ასევე წარმატებით მოხერხდა შტაბებიდან სამხედრო პერსონალის ბრძოლის ველზე გაყვანა“, - განაცხადა კავოლიმ.