"წარმატებული კონტრშეტევა" ხარკოვში - უკრაინის გენშტაბი ინფორმაციას ავრცელებს

უკრაინის შეიარაღებული ძალების გენერალურმა შტაბმა დაადასტურა ხარკოვის ოლქში წარმატებული კონტრშეტევა. ცნობები, რომ უკრაინელი სამხედროები რუსული ძალების პოზიციებს წარმატებით უტევენ, ბოლო რამდენიმე დღის განმავლობაში, სხვადასხვა წყაროთი ვრცელდებოდა, თუმცა, უკრაინის გენერალურმა შტაბმა საჯაროდ მხოლოდ დღეს, 9 სექტემბერს განაცხადა, რომ თავდაცვის ძალები აწარმოებენ წარმატებულ კონტრშეტევას ხარკოვის მიმართულებით და სამ დღეში წინ წაიწიეს თითქმის 50 კილომეტრით.

გენერალური შტაბის მიერ დილით გავრცელებული ინფორმაციით, რომელიც დაზვერვის მონაცემებს ეყრდნობა, მოწინააღმდეგის ქვედანაყოფებმა მნიშვნელოვანი დანაკარგი განიცადეს და დაჭრილების და დაზიანებული ტექნიკის ევაკუაციას ცდილობენ დასახლებული პუნქტების, ოლხოვატკის და ბოროდოიარსკოეს რაიონებში. ეს ორი დასახლებული პუნქტი მდებარეობს ქალაქ ბალაკლეასთან, რომლის გათავისუფლების შესახებ უკრაინელმა სამხედროებმა 8 სექტემბერს განაცხადეს.

უკრაინული სარდლობის თანახმად, საოკუპაციო ძალების წარმომადგენლები სამოქალაქო ტანსაცმლით ცდილობენ დეზერტირობას და რუსეთის ტერიტორიაზე დაბრუნებას. გენერალური შტაბის ინფორმაციით, ბოლო 24 საათში 15-ზე მეტი ასეთი შემთხვევა იყო.