მედია: ჯო ბაიდენი აღმოსავლეთ ევროპაში რამდენიმე ათასი ამერიკელი ჯარისკაცის, სამხედრო ხომალდებისა და თვითმფრინავების გაგზავნას განიხილავს

უკრაინაში რუსეთის შეჭრის გაზრდილი საფრთხიდან გამომდინარე, აშშ-ის პრეზიდენტი ჯო ბაიდენი ბალტიისპირეთსა და აღმოსავლეთ ევროპაში რამდენიმე ათასი ამერიკელი ჯარისკაცის, ასევე სამხედრო ხომალდებისა და თვითმფრინავების გაგზავნას განიხილავს. ამის შესახებ The New York Times-ი წერს.

გაზეთი ინფორმაციას აშშ-ს ადმინისტრაციის წყაროებზე დაყრდნობით ავრცელებს.

გამოცემის ცნობით, პენტაგონის მაღალჩინოსნებმა ჯო ბაიდენს, აშშ-ის სამხედრო ძალების ევროპაში გადასროლის რამდენიმე გეგმა წარუდგინეს.

​ერთ-ერთი ვარიანტი აღმოსავლეთ ევროპის ქვეყნებში 1 000-დან 5 000-მდე ჯარისკაცის გაგზავნას ითვალისწინებს. სიტუაციის გაუარესების შემთხვევაში, ეს რიცხვი შეიძლება გაათმაგდეს. ჯო ბაიდენი აღნიშნულ საკითხთან დაკავშირებით  გადაწყვეტილებას, სავარაუდოდ, მიმდინარე კვირაში მიიღებს.