1700297199
გასული წლის ოქტომბერში, ავსტრიის დედაქალაქ ვენაში, ფეხბურთის მოედნის სარეაბილიტაციო სამუშაოების დროს, მშენებლებმა უპრეცედენტო აღმოჩენა გააკეთეს. მათ, შემთხვევით, საერთო სამარხი აღმოაჩინეს, რომელიც რომის იმპერიის პირველი საუკუნით თარიღდება. სამარხში, სავარაუდოდ, მეომრების ცხედრები იყო, რომლებიც გერმანულ ტომებთან ბრძოლაში მონაწილეობდნენ. ინფორმაციას abcnews-ი ავრცელებს.
არქეოლოგიური ანალიზის შემდეგ, ვენის მუზეუმის ექსპერტებმა, ოთხშაბათს, საჯაროდ პირველად წარმოადგინეს საფლავი, რომელიც დაკავშირებულია "კატასტროფულ მოვლენასთან სამხედრო კონტექსტში" და რეგიონში პირველი ცნობილი ბრძოლის მტკიცებულებაა.
მედიის ცნობით, ვენის, სიმერინგის რაიონში, გათხრების ადგილზე 129 ადამიანის ცხედრის პოვნა დადასტურდა. არქეოლოგიურმა გუნდებმა ადამიანის ცალკეული ძვლებიც აღმოაჩინეს და მიიჩნევენ, რომ დაღუპულთა საერთო რაოდენობა 150-ს აჭარბებს. აღნიშნული ტიპის აღმოჩენა, ცენტრალურ ევროპაში აქამდე არასოდეს ყოფილა.
