თურქული მედიის ცნობით, 15-16 აპრილს თურქეთში, შავი ზღვის უსაფრთხოების საკითხზე დაგეგმილ შეხვედრაში რუსეთი მონაწილეობას არ მიიღებს

თურქეთში, შავი ზღვის უსაფრთხოების საკითხზე დაგეგმილ შეხვედრაში რუსეთი მონაწილეობას არ მიიღებს. აღნიშნულის შესახებ ინფორმაციას თურქული სააგენტო „ანადოლუ“ ავრცელებს.

შავი ზღვის უსაფრთხოების საკითხზე შეხვედრას თურქეთი 15-16 აპრილს უმასპინძლებს. თურქეთის თავდაცვის სამინისტროს ცნობით, შეხვედრა ანკარაში, საზღვაო ძალების შტაბში გაიმართება და მას სხვადასხვა ქვეყნის სამხედრო წარმომადგენლები დაესწრებიან. განხილული იქნება შავ ზღვაში მშვიდობიანი გარემოს შესანარჩუნებლად სამხედრო-საზღვაო დაგეგმარების საკითხები.

თურქეთის თავდაცვის სამინისტროს არ დაუკონკრეტებია, რომელი ქვეყნები მიიღებენ მონაწილეობას დაგეგმილ დისკუსიაში, თუმცა უწყებაში აღნიშნავენ, რომ შეხვედრას არ დაესწრება რუსეთის წარმომადგენელი.