ტრამპის საპასუხოდ, მერცი აცხადებს, რომ გერმანიას შეუძლია დაიცვას თავისი პოზიცია თავდაცვითი ხარჯების გაზრდასთან დაკავშირებით

გერმანიის კანცლერმა, ფრიდრიხ მერცმა უპასუხა აშშ-ის პრეზიდენტის, დონალდ ტრამპის განცხადებას, რომელმაც გერმანიის მცდელობა თავდაცვითი ხარჯების გაზრდასთან დაკავშირებით „სასაცილოდ“ შეაფასა.

ამ კვირაში აშშ-ის პრეზიდენტმა სოციალურ ქსელ Truth Social-ის საშუალებით მკაცრად გააკრიტიკა ნატოს მოკავშირეების თავდაცვითი ხარჯების მაჩვენებლები.

კანცლერმა განაცხადა, რომ გერმანია ოთხ წელიწადში თავდაცვის ბიუჯეტს გააორმაგებს. „ეს არის ყველაზე დიდი ძალისხმევა, რაც კი ოდესმე გაგვიწევია ჩვენი თავდაცვისუნარიანობის გასაძლიერებლად. ამ მხრივ, არანაირი მიზეზი არ გვაქვს, რომ რამის გვრცხვენოდეს“, - განუცხადა მერცმა ჟურნალისტებს.

„ჩვენ ამას მთელი სათანადო მოკრძალებით განვაცხადებთ და ამას ვაკეთებთ, როგორც ევროკავშირის უდიდესი წევრი სახელმწიფო, რომელიც ევროპის ფარგლებში პასუხისმგებლობას ატარებს“, - დასძინა მან.

გასულ წელს ჰააგაში ნატოს ლიდერები შეთანხმდნენ, რომ 2035 წლისთვის მშპ-ის 3.5% დახარჯონ თავდაცვის ძირითად მუხლებზე, როგორიცაა შეიარაღება და ჯარი, ნაცვლად მანამდე არსებული 2%-იანი მიზნისა.

„ჩვენ ასევე ძალიან სერიოზულად აღვიქვამთ რუსულ საფრთხეს და მის წინააღმდეგ ვიარაღდებით. ჩვენ ჰააგაში დადგენილ 3.5%-იან მიზნობრივ მაჩვენებელს უკვე 2029 წელს მივაღწევთ, შეთანხმებულ ვადაზე ბევრად ადრე“, - განაცხადა მერცმა ბერლინში ბალტიისპირეთის ქვეყნების ლიდერებთან შეხვედრისას.