ტრამპის მრჩეველი ბრიტანეთში ქალთა გენიტალიების დასახიჩრების ლეგალიზაციის მოწოდებებს აკრიტიკებს

აშშ-ის მთავრობის ერთ-ერთმა მაღალჩინოსანმა მკაცრად გააკრიტიკა ბრიტანული სამედიცინო გამოცემა, რომელმაც ქალთა გენიტალიების დასახიჩრების (FGM) გამამართლებელი სტატია გამოაქვეყნა. მისი თქმით, მსგავსი მიდგომები საფრთხეს უქმნის საზოგადოების ერთიანობას და ხელს უწყობს „პარალელური საზოგადოებების“ ჩამოყალიბებას დიდ ბრიტანეთში.

GB News-ის წამყვან ჩარლი პიტერსთან ექსკლუზიურ ინტერვიუში აშშ-ის სახელმწიფო მდივნის მოადგილემ, სიტყვის თავისუფლების აქტიურმა მხარდამჭერმა სარა როჯერსმა, ასევე ისაუბრა „ორ-საფეხურიან ბრიტანეთზე“, რომელიც, მისი თქმით, სამართლებრივ სისტემაშიც და სხვა სფეროებშიც იკვეთება.

კითხვაზე, წარმოადგენს თუ არა ევროპის მთავარ საფრთხეებს შიდა პრობლემები და არა გარე ფაქტორები, როჯერსმა უპასუხა:

„თქვენ ძალიან ზუსტად აღნიშნეთ პარალელური საზოგადოებების გაჩენის პრობლემა ბრიტანეთში. მე ბრიტანელი არ ვარ, მაგრამ რასაც ვაკვირდები თქვენი მედიისა და ადგილობრივი მოსახლეობის მეშვეობით, საგანგაშოა. ვხედავ, რომ NHS-მა ნათესავთა შორის ქორწინება გაამართლა იმ მოტივით, რომ ეს მიგრანტებისთვის ტრადიციული პრაქტიკაა. ასევე ვხედავ, რომ British Medical Journal-მა გამოაქვეყნა სტატია სადაც ქალთა გენიტალიების დასახიჩრების გამართლებაა, ის, რაც ცივილიზებულ ქვეყანაში წარმოუდგენელი გვეგონა.“

სტატია, რომელიც გამოცემამ ამ თვეში გაავრცელა, ეფუძნება 25 საერთაშორისო ინსტიტუტის კვლევებს და ამტკიცებს, რომ აღნიშნული პრაქტიკის მკაცრი კრიტიკა ხშირად „დამახინჯებულ და რასობრივ სტერეოტიპებზე“ და „დასავლურ სენსაციალიზმზე“ არის აგებული.

გამოცემაში ნათქვამია, რომ „უმეტეს შემთხვევაში დაზარალებული ქალები თავად იშვიათად იყენებენ სიტყვა ‘ტრავმას’ საკუთარი გამოცდილების აღსაწერად“ და თუ ნეგატიურ შეფასებას აძლევენ, უფრო ხშირად ამბობენ, რომ ეს გამოცდილება „რთული“ ან „მტკივნეული“ იყო.

ქალთა გენიტალური დასახიჩრება მსოფლიოში 230 მილიონზე მეტ გოგოსა და ქალს შეეხო, ძირითადად აფრიკის ქვეყნებში, თუმცა ასევე აზიისა და ახლო აღმოსავლეთის რეგიონებშიც. მსოფლიო ჯანდაცვის ორგანიზაცია (WHO), UNICEF და დასავლეთის ქვეყნების უმრავლესობა ერთხმად გმობენ ამ პრაქტიკას და მას გოგონებისა და ქალების ფუნდამენტური უფლებების დარღვევად მიიჩნევენ.

სარა როჯერსის თქმით, მსგავსი პუბლიკაციები საფრთხეს უქმნის ადამიანის უფლებათა უნივერსალურ პრინციპებს და საზოგადოებაში ღრმა განხეთქილებას აძლიერებს.