საბერძნეთში ჩამოვარდნილ თვითმფრინავში უკრაინელები იმყოფებოდნენ - ყველა მგზავრი დაიღუპა

საბერძნეთში ჩამოვარდნილ უკრაინულ თვითმფრინავზე რვა ადამიანი იმყოფებოდა. ყველა მათგანი დაღუპულია, ამის შესახებ უკრაინული მედია წერს. 

გამოცემის ცნობით, რვავე მგზავრი უკრაინის მოქალაქეები იყვნენ.

მისივე განცხადებით, თვითმფრინავის ჩამოვარდნის მიზეზი სავარაუდოდ ტექნიკური გაუმართაობა გახდა, თუმცა კატასტროფის მიზეზების გამოვლენის შესახებ გამოძიება მიმდინარეობს.

ავიაკატასტროფას გამოეხმაურნენ სერბეთის თავდაცვის სამინისტროში და განაცხადეს, რომ თვითმფრინავს გადაჰქონდა სერბული წარმოების 11,5 ტონა საბრძოლო მასალა და აღჭურვილობა, რომელიც ქვეყანა ბანგლადეშის თავდაცვის სამინისტრომ შეუკვეთა. თვითმფრინავს ტვირთი იორდანიის, საუდის არაბეთის და ინდოეთის გავლით, ბანგლადეშის დედაქალაქ დაკაში უნდა ჩაეტანა.

თვითმფრინავის ბორტზე მყოფი ყველა მგზავრის დაღუპვა სერბეთის თავდაცვის სამინისტროშიც დაადასტურეს.