საბერძნეთი მასშტაბური თავდაცვითი სისტემის, „აქილევსის ფარის“ შექმნას აპირებს

საბერძნეთი შეიარაღებული ძალების მოდერნიზაციის ფარგლებში აპირებს, შექმნას თავდაცვითი სისტემა „აქილევსის ფარი“, რომელსაც დაცვის ხუთი დონე ექნება. ამის შესახებ ბერძნული მედია წერს.

მედიის ცნობით, თავდაცვითი სისტემა ქვეყანას დაიცავს როგორც ბალისტიკური, ისე ხომალდსაწინააღმდეგო რაკეტებისგან, ასევე, წყალქვეშა ნავებისგან და დრონების თავდასხმებისგანაც.

როგორც მედია წერს, „აქილევსის ფარის“ შექმნის ღირებულება 2,8 მილიარდი ევრო იქნება და მისი ამოქმედება 2027 წელს არის დაგეგმილი.

როგორც საბერძნეთის პრემიერ-მინისტრმა, კირიაკოს მიცოტაკისმა განაცხადა, საბერძნეთს აქვს ჰაერსაწინააღმდეგო თავდაცვითი სისტემა „პატრიოტი“, თუმცა არსებული მოთხოვნის გათვალისწინებით, 4-5 წელიწადში შესაძლებელია, ახალი სისტემის შექმნისთვის აუცილებელი რესურსიც გაჩნდეს.

„ისრაელმა, რომელთანაც ჩვენ სტრატეგიული კავშირი გვაქვს, შეიძლება ეს შესაძლებლობა უფრო ადრეც მოგვცეს“, – აცხადებს მიცოტაკისი.

მიცოტაკისმა ახსენა დისკუსიები, რომლებიც ისრაელის კომპანია Elbit-ისგან ზალპური ცეცხლის რეაქტიული სისტემის, PULS-ის 36 ერთეულის შეძენასთან დაკავშირებით მიმდინარეობს. ამ სისტემების შეძენა საბერძნეთს 700 მილიონი ევრო დაუჯდება.

ამასთან ერთად, საბერძნეთი აწარმოებს მოლაპარაკებას გერმანულ კომპანიებთან, სისტემა IRIS-T-ის შესყიდვასთან დაკავშირებით.

ასევე განიხილება კრიტიკული ინფრასტრუქტურის ობიექტებზე უპილოტო საფრენი აპარატების საწინააღმდეგო სისტემების დამონტაჟებაც.

შეგახსენებთ, მანამდე მიცოტაკისმა თქვა, რომ საბერძნეთი 2036 წლამდე შეიარაღებული ძალების მოდერნიზაციისთვის 25 მილიარდ ევროს დახარჯავს.