პუტინის კრიტიკის გამო, რუსი დეპუტატი ჟერარ დეპარდიესთვის რუსული პასპორტის ჩამორთმევას ითხოვს

რუსეთის სახელმწიფო დუმის დეპუტატმა, სულთან ხამზაევმა რუსეთის ხელისუფლებას მოუწოდა, ჟერარ დეპარდიეს რუსეთის მოქალაქეობა ჩამოართვან. ამის შესახებ უცხოური მედია წერს. 

დეპუტატის მოწოდების მიზეზი მსახიობის განცხადება გახდა, რომელმაც პუტინის ქმედებები დაგმო და განაცხადა, რომ აპრილის დასაწყისში დაგეგმილი მისი სამი კონცერტის მთლიანი შემოსავალი ომით დაზარალებულ უკრაინელებს გადაეცემათ.

„რუსი ხალხი არ არის პასუხისმგებელი ვლადიმერ პუტინის მსგავსი ლიდერების შეშლილ და მიუღებელ გადახრებზე“, - აღნიშნა ფრანგმა მსახიობმა.

„მნიშვნელოვანია ვისაუბროთ ჟერარ დეპარდიეს პასპორტის ჩამორთმევის აუცილებლობაზე მისი თავხედური თავდასხმებისა და პრეტენზიისთვის ისაუბროს რუსი ხალხის სახელით“, - აღნიშნა დეპუტატმა.

ჟერარ დეპარდიეს 2013 წლიდან რუსული პასპორტი აქვს, რომელიც მას პირადად ვლადიმერ პუტინმა გადასცა.