პოლონეთში სანაყინის ქვეშ შუა საუკუნეებში მცხოვრები რაინდის სამარხი იპოვეს

არქეოლოგებმა პოლონეთის საპორტო ქალაქ გდანსკში, სანაყინის ქვეშ შუა საუკუნეების სამარხი აღმოაჩინეს, რომელზეც რაინდის გამოსახულება იყო ამოკვეთილი. სამარხში ნაპოვნი მე-13 საუკუნის ჩონჩხი სავარაუდოდ თავად ეს რაინდი უნდა ყოფილიყო.

"ჩვენ კირქვის დიდი ფილა ვიპოვეთ, რომელზეც ჯაჭვის პერანგში გამოწყობილი რაინდის გამოსახულებაა. ასეთი ფილა შუა საუკუნეების პოლონეთისთვის დიდი იშვიათობაა და დღემდე მხოლოდ რამდენიმეა ნაპოვნი", — ამბობს არქეოლოგი სილვია კურზინსკა ArcheoScan-დან.

 ივლისში მკვლევრებმა არქეოლოგიური ძეგლი გდანსკის ისტორიულ ცენტრში იპოვეს. ეს მოულოდნელი აღმოჩენა XI-XIV საუკუნეების ციხესიმაგრის ტერიტორიაზე მიმდინარე გათხრების დროს გაკეთდა. ციხესიმაგრის ტერიტორიაზე ციხე-კოშკის, ეკლესიისა და სასაფლაოს ნანგრევებია შემორჩენილი.

საფლავის ამოკვეთილი ქვის წინასწარი დათარიღებით ირკვევა, რომ იგი მე-13 საუკუნის ბოლო პერიოდს უნდა მიეკუთვნებოდეს. კირქვისგან დამზადებულ 150-სმ სიგრძის ფილაზე აღმართულ მდგომარეობაში მყოფი კაცია გამოსახული. მას ჯავშანი აცვია და ფარ-ხმალი უჭირავს.

"იმის მიუხედავად, რომ ფილა რბილი კირქვისგან იყო დამზადებული, მან საუკუნეების განმავლობაში მიწაში დამარხულმა გაძლო და ამოკვეთილი გამოსახულება ჯერ კიდევ კარგად ჩანს. ფილის ასეთი სახით შენარჩუნება ნამდვილად საოცარია", — აცხადებსკურზინსკა.

ფილის აღმოჩენიდან მალევე ArcheoScan-ის გუნდმა ქვა ამოიღო და ადგილი უფრო ღრმად გათხარა. მათ კარგად შემონახული კაცის ჩონჩხი აღმოაჩინეს, მაგრამ სამარხში ნეშტთან ერთად სხვა ნივთები არ ყოფილა.

ყველა მტკიცებულება იმაზე მიუთითებს, რომ აღმოჩენილი კაცი მაღალ სოციალურ ფენას მიეკუთვნებოდა. მეცნიერების ვარაუდით იგი რაინდი ან რაიმე სამხედრო ფუნქციის მქონე პირი იყო. იმის მიუხედავად, რომ ამ სამარხის თარიღი და მდებარეობა ტევტონთა ორდენის აღზევებას ემთხვევა, მკვლევრებმა კაცის ამ ორდენთან კავშირის დასადასტურებლად მტკიცებულება ვერ იპოვეს. სამარხში არ იყო რაიმე წარწერა ან სიმბოლო, რომელიც ამაზე მიუთითებდა.

 კურზინსკას თქმით, ეს აღმოჩენა გდანსკის ისტორიისთვის მნიშვნელოვანია, რადგან ის პირდაპირი კავშირია ქალაქის ჩამოყალიბების პერიოდთან. იგი შუა საუკუნეების ელიტის ცხოვრებისა და სამარხების შესწავლის იშვიათ შანსს გვაძლევს.

სამარხის ფილასა და ჩონჩხზე დამატებითი სამუშაოები უკვე მიმდინარეობს. მკვლევრები ფილას მაღალი გარჩევადობის 3D სკანირების მეთოდით იკვლევენ, რათა უნიკალური გამოსახულება აღადგინონ და შეინარჩუნონ. გარდა ამისა, ძვლების ქიმიური და გენეტიკური ანალიზი მათ დაეხმარება უკეთ გაიგონ თუ ვინ იყო ეს ადამიანი და როგორი ცხოვრება ჰქონდა მას.

მეცნიერები თავის ქალის საფუძველზე სახის რეკონსტრუქციას გეგმავენ, რათა დადგინდეს თუ როგორ გამოიყურებოდა რაინდი, რომელსაც საზოგადოებამ "გდანსკის ლანსელოტი" შეარქვა.