ომის შემსწავლელი ინსტიტუტი: მტკიცებულება, რომ უკრაინამ ვლადიმერ პუტინის რეზიდენციაზე თავდასხმა განახორციელა, არ არსებობს

ომის შემსწავლელი ამერიკული ინსტიტუტის (ISW) განცხადებით, მტკიცებულება, რომ უკრაინამ ვლადიმერ პუტინის რეზიდენციაზე თავდასხმა განახორციელა, არ არსებობს.

პლატფორმის ანალიტიკოსების განმარტებით, მსგავსი „თავდასხმის“ შესახებ დადასტურებული მტკიცებულებები არ მოიპოვება. ამასთან, ობიექტის მახლობლად ღია წყაროებში არ არის გეოლოკაციური ვიდეოები, აფეთქებების, ხანძრების ან კვამლის კადრები.

ინსტიტუტის ანალიტიკოსები ხაზგასმით აღნიშნავენ, რომ უკრაინულმა ძალებმა დაარტყეს სამხედრო სამიზნეებს ნოვგოროდის რეგიონში და ეს თავდასხმები დადასტურებულია. მათივე თქმით, რუსულმა მხარემ არ წარმოადგინა არანაირი მტკიცებულება იმ თეორიის დასადასტურებლად, რომ პუტინის რეზიდენცია 29 დეკემბერს დაიბომბა.

„ISW-ს არ დაუფიქსირებია მსგავსი ვიდეომასალა, არც ადგილობრივი ან რეგიონული რეპორტაჟი პუტინის რეზიდენციის მახლობლად უკრაინის საჰაერო დარტყმების შესახებ, რაც ადასტურებდა ლავროვის მტკიცებას. ლავროვის მტკიცება ნოვგოროდის ოლქში 89 უკრაინული დრონის ჩამოგდების შესახებ ასევე ეწინააღმდეგება რუსეთის თავდაცვის სამინისტროს მტკიცებას, რომ რუსულმა ძალებმა 28-29 დეკემბრის ღამით ოლქში 47 უკრაინული დრონი ჩამოაგდეს, რაც კიდევ უფრო ამყარებს ამ მტკიცებას. უკრაინულმა ძალებმა ადრე ნოვგოროდის ოლქში მრავალ სამხედრო სამიზნეს დაარტყეს, რასაც მტკიცებულებები წარმოადგენდა. კრემლმა არ წარმოადგინა არანაირი მტკიცებულება იმის დასადასტურებლად, რომ უკრაინულმა ძალებმა 29 დეკემბერს პუტინის რეზიდენცია დაბომბეს“, – ნათქვამია განცხადებაში.

ცნობისთვის, რუსეთის საგარეო საქმეთა მინისტრ სერგეი ლავროვის განცხადებით, 28-29 დეკემბერს კიევმა ვლადიმერ პუტინის სახელმწიფო რეზიდენციაზე თავდასხმა 91 უპილოტო საფრენი აპარატით სცადა. ამასთან, აშშ-ის პრეზიდენტმა, დონალდ ტრამპმა განაცხადა, რომ რუსეთის პრეზიდენტის რეზიდენციაზე სავარაუდო თავდასხმის შესახებ ვლადიმერ პუტინისგან შეიტყო – „ეს კარგი არ არის, სულ სხვა რამაა მის სახლზე თავდასხმა“.