მოსკოვის მერი აცხადებს, რომ აღკვეთილია დედაქალაქზე დრონით შეტევა

რუსეთის ხელისუფლებამ განაცხადა, რომ გასული ღამის განმავლობაში უპილოტო საფრენი აპარატებით შეტევა იყო რამდენიმე რეგიონზე, მათ შორის მოსკოვის ოლქზე.

მოსკოვის მერის, სერგეი სობიანინის თანახმად, დრონი, რომელიც დედაქალაქისკენ მიფრინავდა, მოსკოვის ოლქის ქალაქ პოდოლსკში ჩამოაგდეს. სობიანინი ტელეგრამზე წერს, რომ არავინ დაშავებულა და არაფერი დანგრეულა. მსხვერპლის და ნგრევის გარეშე დასრულებული შეტევის შესახებ იუწყება ბრიანსკის ოლქის გუბერნატორი ალექსანდრ ბოგომაზიც. დამოუკიდებელი წყაროებით ეს ცნობები გადაუმოწმებელია.

რუსეთის თავდაცვის სამინისტრომ დილით გამოაქვეყნა ინფორმაცია ტრადიციული ფორმულირებით, რომ „აღკვეთილია კიევის რეჟიმის მცდელობა, ტერორისტული შეტევა განეხორციელებინა თვითმფრინავის ტიპის უპილოტო საფრენი აპარატების გამოყენებით“ და გასული ღამის განმავლობაში სამი უპილოტო საფრენი აპარატი ჩამოაგდეს ბრიანსკის ოლქში და თითო მოსკოვის და ბელგოროდის ოლქებში.

რუსეთის თავდაცვის სამინისტრო არაფერს ამბობს კალუგის ოლქზე, სადაც დრონებით შეტევა იყო ნავთობგადამამუშავებელ საწარმო „პირველი ქარხანაზე“.