ლონდონში მძარცველები საიუველირო მაღაზიაში გვირაბის გათხრას ცდილობდნენ - როგორ ჩავარდა მათი გეგმა

ლონდონის პოლიციამ ორგანიზებული დანაშაულებრივი ჯგუფის წევრები დააკავა, რომლებიც საიუველირო მაღაზიაში შეღწევას უჩვეულო გზით ცდილობდნენ. მძარცველებმა მეზობელ შენობაში შეაღწიეს და კედლის გარღვევით ძვირფასეულობის მაღაზიამდე გვირაბის გაყვანა დაიწყეს. თუმცა, მათი გეგმა პოლიციამ ჩაშალა.

მძარცველები საიუველირო მაღაზიაში მეზობელი შენობიდან შეღწევას გეგმავდნენ.

გამოძიების ინფორმაციით, მამაკაცებს მეზობელ მასაჟის სალონში უკანონოდ ჰქონდათ შეღწეული. სწორედ ამ შენობიდან ცდილობდნენ კედლის გარღვევას, რათა გვერდით მდებარე საიუველირო მაღაზიაში მოხვედრილიყვნენ.

პოლიციამ ადგილზე იპოვა ჩანთები, რომლებშიც გვირაბის გასათხრელად საჭირო ხელსაწყოები და აღჭურვილობა ინახებოდა. სამართალდამცველების ჩარევამ მძარცველებს გეგმის დასრულების საშუალება არ მისცა.

გამოძიება ამით არ დასრულებულა. პოლიციამ დანაშაულებრივ ჯგუფთან დაკავშირებული ავტომობილი გამოავლინა, ხოლო მობილური ტელეფონის მონაცემების გამოყენებით მესამე ეჭვმიტანილის ადგილსამყოფელი დაადგინა.

გამომძიებლებმა სათვალთვალო კამერების ჩანაწერებიც შეისწავლეს. მათ ხელთ არსებული მასალა ჯგუფის წევრების მიერ დანაშაულისთვის საჭირო ხელსაწყოებისა და სხვა აღჭურვილობის შეძენას ასახავდა.

გამოძიების თანახმად, სამი მამაკაცი ლონდონში 2026 წლის მაისიდან ივლისამდე პერიოდში მომხდარ რამდენიმე ძარცვასთან იყო დაკავშირებული. ჯგუფის წევრები ძირითადად საიუველირო მაღაზიებს უმიზნებდნენ და შენობებში ღამით შეღწევას ცდილობდნენ.

პოლიციის ინფორმაციით, გამოძიებამ ჯგუფი ისეთ დანაშაულებთან დააკავშირა, რომელთა საერთო ღირებულება 936 000 დოლარზე მეტს აღემატება. სამართალდამცველები ასევე იკვლევდნენ შესაძლო კავშირებს ევროპის სხვა ქვეყნებში მომხდარ მსგავს დანაშაულებთან.

რა სასჯელი მიიღეს მძარცველებმა?

2026 წლის აგვისტოში სამივე მამაკაცმა დანაშაული აღიარა. 23 ოქტომბერს, კინგსტონის სასამართლოში, მათ პატიმრობა მიესაჯათ: სასჯელების საერთო ხანგრძლივობა 10 წელსა და 2 თვეს შეადგენს.