„ის ცოცხლად დამარხეს, როგორც დედამიწისთვის შეწირული მსხვერპლი...“ - ახალგაზრდა მამაკაცმა, რომელმაც ფესტივალზე ბევრი ალკოჰოლი მიიღო, კუბოში გაიღვიძა

30 წლის მამაკაცმა, რომელმაც ბოლივიაში, ქალაქ ელ ალტოში მიმდინარე ფესტივალზე გონება დაკარგა, კუბოში გაიღვიძა. ამის შესახებ ინფორმაციას უცხოური მედია ავრცელებს.

ვიქტორ უგო მიკა ალვარესი ამბობს, რომ დედამიწისადმი მიძღვნილ ფესტივალზე დიდი რაოდენობით კოქტეილს სვამდა, შემდეგ განვითარებული მოვლენები კი უკვე აღარ ახსოვს. როდესაც ის გონზე მოვიდა, აღმოაჩინა, რომ დახურულ კუბოში წევს

„მახსოვს მხოლოდ ის, რომ მეჩვენებოდა თითქოს საკუთარ საწოლში ვარ, მინდოდა ადგომა და ტუალეტში გასვლა, მაგრამ ვერ ვმოძრაობდი“,  - იხსენებს ალვარესი. ის ეჭვობს, რომ ფესტივალის სხვა მონაწილეებმა ის ცოცხლად დამარხეს, როგორც დედამიწისთვის შეწირული მსხვერპლი.

ალვარესმა კუბოს შუშის სახურავის გატეხა და თავის დაღწევა შეძლო. ამის შემდეგ მამაკაცი პოლიციაში მივიდა, თუმცა სამართალდამცველებმა მას არ დაუჯერეს იმ საბაბით, რომ ის ძალიან ნასვამი იყო.