ირანის პრეზიდენტი აცხადებს, რომ ქვეყანა სრულმასშტაბიან ომში იმყოფება და ქვეყნის ეკონომიკურ სირთულეებს აღიარებს

ირანის პრეზიდენტმა, მასუდ პეზეშკიანმა განაცხადა, რომ ქვეყანა „სრულმასშტაბიან ომში“ იმყოფება და აღიარა ქვეყნის ეკონომიკური სირთულეები იმ ფონზე, როდესაც აშშ ირანის წინააღმდეგ სანქციების გამკაცრებისთვის ემზადება. ინფორმაციას CNN-ი ავრცელებს.

„ვწუხვართ, რომ ეს პრობლემები არსებობს, რადგან ჩვენ სრულმასშტაბიანი ეკონომიკური, სამხედრო და ეროვნული უსაფრთხოების წინააღმდეგ მიმართული ომის პირობებში აღმოვჩნდით. როგორც მთავრობა, მთელი ჩვენი ძალისხმევით ვცდილობთ, რომ ინფლაცია, საზოგადოებაში არსებული პრობლემები, ხალხის საარსებო პირობები, სამუშაო ადგილები, მომავალი და თავად ადამიანების ცხოვრება ღირსეულ და საამაყო მდგომარეობამდე მივიყვანოთ“, - განაცხადა პეზეშკიანმა.

როგორც მედია წერს, ირანი, რომელიც უკვე გამოფიტულია წლების განმავლობაში დაწესებული სანქციებით და ომის შედეგებს ებრძვის, ახლა ახალი გამოწვევის წინაშე დგას: აშშ-ის პრეზიდენტი დონალდ ტრამპი მის ეკონომიკაზე კიდევ უფრო დიდი ზეწოლით იმუქრება. მანამდე, აშშ-ის ფინანსთა მინისტრმა, სკოტ ბესენტმა განაცხადა, რომ თეირანის წინააღმდეგ ეკონომიკურ ზომებს მიიღებენ, „რომლებიც აქამდე არასდროს უნახავთ“.