ირანის პარლამენტის სპიკერი: ამერიკელები მალე ოთხდოლარიანი ბენზინის ეპოქას ნოსტალგიით გაიხსენებენ

ამერიკელები მალე ოთხდოლარიანი ბენზინის ეპოქას ნოსტალგიით გაიხსენებენ, – ამის შესახებ ირანის პარლამენტის სპიკერმა, მოჰამად ბაღერ ღალიბაფმა განაცხადა. სწორედ ღალიბაფი ხელმძღვანელობდა ირანის დელეგაციას აშშ-თან მოლაპარაკებებში.

„ისიამოვნეთ საწვავის ამჟამინდელი ფასებით. ე.წ. ბლოკადის გამო მალე 4-5-დოლარიან ბენზინზე ნოსტალგია გექნებათ“, – აღნიშნა ირანის პარლამენტის სპიკერმა.

ღალიბაფმა ასევე გამოაქვეყნა მათემატიკური განტოლება, რომელიც მიუთითებს, რომ ფასების ზრდა რთული და არაწრფივი იქნება.

აშშ-ის საავტომობილო ასოციაციის ცნობით, 2026 წლის 12 აპრილის მონაცემებით, აშშ-ში ჩვეულებრივი ბენზინის საშუალო ეროვნული ფასი გალონზე დაახლოებით 4.12 აშშ დოლარია. ერთი გალონი 3.7 ლიტრია.