დრამატურგი რომ სტოპარდი გარდაიცვალა

 ბრიტანელი დრამატურგი, რეჟისორი და სცენარისტი სერ ტომ სტოპარდი 88 წლისა გარდაიცვალა.

მისი წარმომადგენლების მიერ გავრცელებულ განცხადებაში აღნიშნულია, რომ მწერალი საკუთარ სახლში, ოჯახის წევრების გარემოცვაში დაიღუპა. მის გარდაცვალებას დიდი ბრიტანეთის მეფე და დედოფალი გამოეხმაურნენ, რომლებმაც მას „ძვირფასი მეგობარი“ უწოდეს. ჩარლზ მესამისა და დედოფალ კამილას მიერ გავრცელებულ განცხადებაში აღნიშნულია, რომ სამეფო წყვილი ღრმად არის დამწუხრებული „ჩვენი ერთ-ერთი უდიდესი მწერლის გარდაცვალებით“.

ტომ სტოპარდი გასული საუკუნის მეორე ნახევრის ერთ-ერთ ყველაზე მოთხოვნად დრამატურგად ითვლებოდა. ის წერდა კინოსთვის, რადიოსთვის, თეატრისა და ტელევიზიისთვის, იყო დიდი ბრიტანეთის ეროვნული სამეფო თეატრის დრამატურგი. მის გამორჩეულ პიესებს შორის არის: „როზენკრანცი და გილდენშტერნი დაიხოცნენ“, „ტრავესტი“, „შემოდის თავისუფალი ადამიანი“, „არკადია“, „უტოპიის ნაპირი“, „როკ ენ როლი“. მას ეკუთვნის სცენარები ფილმებისთვის „ბრაზილია“ (რეჟ. ტერი გილიამი), „შეყვარებული შექსპირი“ (ჯონ მედენი), „ანა კარენინა“ (ჯო რაიტი).

1990 წელს სტოპარდმა საკუთარი პიესის „როზენკრანცი და გილდენშტერნი დაიხოცნენ“ ეკრანიზაცია გადაიღო, რომელშიც გარი ოლდმანმა და ტიმ როთმა ითამაშეს.

სტოპარდი ლორენს ოლივიეს თეატრალური პრემიის სამგზის და „ტონის“ ხუთგზის ლაურეატი იყო, „შეყვარებული შექსპირის“ სცენარისთვის კი „ოსკარი“ და „ოქროს გლობუსი“ მიიღო. 1978 წელს დედოფალმა ელისაბედ მეორემ მას ბრიტანეთის იმპერიის ორდენის კომანდორის ტიტული მიანიჭა, 1997 წელს კი თეატრალურ ხელოვნებაში შეტანილი წვლილისთვის რაინდად აკურთხა.