ცეცხლსასროლი იარაღი, ნიღაბი, ჩაქუჩი, ბენზინის ბოთლი და ხანძრის გაჩენის მცდელობა - ვისი მითითებით მოქმედებდა შენიღბული ელისაშვილი და ვის აკისრებს პასუხისმგებლობას მმართველი გუნდი

ჯერ გამორიცხა და საქმეს პოლიტიკურ უწოდა, რამდენიმე საათში კი ალეკო ელისაშვილის ადვოკატმა თავად დაადასტურა, რომ კოალიცია "ძლიერი საქართველოს" ლიდერი მთაწმინდიდან დიღომში სასამართლოს კანცელარიის დასაწვავად მივიდა.

ინტერესების დამცველის განცხადებით, ელისაშვილი მარტო მოქმედებდა, გეგმაც გაწერილი ჰქონდა და შეიარაღებულიც იყო. ელისაშვილი ახლა არა ჩადენილ ქმედებას, არამედ იმას ნანობს, რომ დაწყებული საქმე ბოლომდე ვერ მიიყვანა.

შემთხვევის ადგილიდან ამოღებული იარაღი და ბენზინის ბოთლები ელისაშვილის საქმეში ერთ-ერთი მთავარი მტკიცებულებებია. გამოძიებით დადგინდა, რომ კოალიცია "ძლიერი საქართველოს" ლიდერი საქალაქო სასამართლოს კანცელარიაში გამთენიისას შეიჭრა და შენობის დაწვა სცადა. გეგმის სისრულეში მოყვანამდე რამდენიმე წუთით ადრე კი ის მანდატურის სამსახურის წარმომადგენლებმა შეაჩერეს.

შინაგან საქმეთა სამინისტროს ინფორმაციით, კოალიცია "ძლიერი საქართველოს" წევრმა მანდატურებს ცეცხლსასროლი იარაღით წინააღმდეგობა გაუწია, მიაყენა ფიზიკური შეურაცხყოფაც, დაზიანებები თავადაც მიიღო. უწყების ცნობით, ერთ-ერთი მანდატური სამედიცინო დაწესებულებაშია გადაყვანილი.

ხელბორკილები ალეკო ელისაშვილს შემთხვევის ადგილზე დაადეს, მოგვიანებით კი დიღმის მთავარ სამმართველოში გადაიყვანეს, სადაც ამ დრომდე ბრალის წარდგენის მოლოდინშია. დროებითი მოთავსების იზოლატორთან მისივე თანაგუნდელები მივიდნენ, თუმცა კომენტარის გაკეთება არ ისურვეს.

მოგვიანებით კოალიცია "ძლიერმა საქართველომ" წერილობითი განცხადება გაავრცელა.

პარლამენტის გადაწვის მცდელობის შემდეგ, სასამართლოს კანცელარიის დაწვის მცდელობა "ქართული ოცნებისთვის" მოულოდნელი არ ყოფილა. მმართველ გუნდში ალეკო ელისაშვილის ქმედებას ტერორისტული აქტი უწოდეს.

სახელისუფლებო პარტიაში ამბობენ, რომ ქვეყნის შიგნით რადიკალურ პროცესებს გარედან ახალისებენ.

ელისაშვილის წინააღმდეგ სისხლის სამართლის საქმეზე გამოძიება დანაშაულის მცდელობისა და ნივთის დაზიანება ან განადგურების მუხლებით მიმდინარეობს.