დონალდ ტრამპი აცხადებს, რომ განიხილავს გარიგებას, რომლის ფარგლებშიც შესაძლოა, ჩინეთი დათანხმდეს „ტიკ ტოკის“ გაყიდვას ტარიფების შემსუბუქების სანაცვლოდ

აშშ-ის პრეზიდენტი დონალდ ტრამპი აცხადებს, რომ განიხილავს გარიგებას, რომლის ფარგლებშიც ჩინეთი შესაძლოა, დათანხმდეს „ტიკ ტოკის“ გაყიდვას ტარიფების შემსუბუქების სანაცვლოდ. ამის შესახებ ტრამპმა Air Force One-ის ბორტზე ჟურნალისტებთან საუბრისას აღნიშნა.

„ტიკ ტოკთან“ დაკავშირებით ტრამპმა განაცხადა, რომ გარიგება ახლოსაა დასრულებასთან და მასში მრავალი ინვესტორია ჩართული.

„მაგალითად, „ტიკ ტოკთან“ გვაქვს ვითარება, სადაც ჩინეთი, სავარაუდოდ, იტყვის, რომ დათანხმდება გარიგებას“,- აღნიშნა ტრამპმა.

ჟურნალისტის კითხვაზე, არის თუ არა ეს, რაც მან ჩინეთთან განიხილა ან ეს ინფორმაცია გაიგო თუ არა მათგან, ტრამპმა უპასუხა: „არა, მე უბრალოდ მაგალითის სახით ვიყენებ ამას. ჩვენ ძალიან ახლოს ვართ „ტიკ ტოკთან“ დაკავშირებულ გარიგებასთან ძალიან კარგ ადამიანთა ჯგუფთან.

ვფიქრობ, რომ ჩინეთმა შესაძლოა, დარეკოს და თქვას,  რომ ისინი უკმაყოფილოები არიან ტარიფებით და შეიძლება, სურდეთ რაღაცის მიღება, რათა დათანხმდნენ „ტიკ ტოკის“ გარიგებას“, – განაცხადა ტრამპმა.

„ტიკ ტოკის“ მფლობელ კომპანიას ვადა შაბათამდე აქვს, რათა იპოვოს მყიდველი, წინააღმდეგ შემთხვევაში აპლიკაციას აშშ-ში აკრძალვა ემუქრება.