ახალი ტარიფების გამო ფინანსური ბაზრის ვარდნა მოსალოდნელი იყო და ეს ნაბიჯი აუცილებელია ეკონომიკის განსაკურნებლად - ტრამპი

აშშ-ის პრეზიდენტმა, დონალდ ტრამპმა აღნიშნა, რომ ახალი ტარიფების გამო ფინანსური ბაზრის ვარდნა მოსალოდნელი იყო და ეს ნაბიჯი აუცილებელია ეკონომიკის „განსაკურნებლად“.

„ოპერაცია დასრულდა და ახლა მდგომარეობა დასტაბილურდება“,  – განაცხადა დონალდ ტრამპმა Air Force One-ის ბორტზე ჟურნალისტებთან შეხვედრისას.

კითხვაზე, თუ რა შეუძლია უთხრას ამერიკელ მუშებსა და ბიზნესებს, რომლებიც საბოლოოდ შეიძლება, დაზარალდნენ საპასუხო ტარიფებით, ტრამპმა განაცხადა: „ვფიქრობ, ყველაფერი მოგვარდება. გახსოვდეთ, ტარიფები არ არსებობს, თუ თქვენი ქარხანა ან პროდუქცია აშშ-ში იქმნება. იქნება გარდამავალი პერიოდი, რადგან ისინი ააშენებენ, ნაცვლად იმისა, რომ გადაიხადონ ტარიფები სხვა ადგილას“, – აღნიშნა აშშ-ის პრეზიდენტმა.

ტრამპის თქმით, მან უკვე ისაუბრა ხუთიდან ორ მთავარ ავტომწარმოებელთან.

„მათ უკვე დაიწყეს თავიანთი ნაწილების წარმოების გადატანა მექსიკიდან, კანადიდან აშშ-ში“, – განაცხადა დონლად ტრამპმა.

მისივე თქმით, იგი მზად არის ტარიფების შესახებ მოლაპარაკებისთვის, თუ სხვა ქვეყნები რაიმე ფენომენალურს შესთავაზებენ.