ჯანდაცვის სამინისტრომ საცხოვრებელ კორპუსში არსებულ, სტერილური სამედიცინო მასალების საწარმოს საქმიანობის უფლება შეუჩერა

დაავადებათა კონტროლისა და საზოგადოებრივი ჯანმრთელობის ეროვნული ცენტრის ვებ გვერდზე არსებული ინფორმაციით, შპს "მედ ფარმასი გრუპს" (რეგ.#433) რომელიც თბილისში, გორგასლის #111ა- ში, მრავალბინიან საცხოვრებელ კორპუსში ახორციელებდა სამედიცინო ქირურგიული მასალების წარმოებას და სტერილიზაციას, შეუჩერდა ქიმიური ნივთიერება ეთილენის ოქსიდის გამოყენების და წარმოების გაგრძელების უფლება.

ჯანდაცვის სამინისტროს გაცხადებული აქვს, რომ აუცილებელია სამედიცინო მასალების ხარისხის და წარმოების უსაფრთხოების გამკაცრება, შესაბამისად აღნიშნული ქმედებაც სავარაუდოდ უკავშირდება ამ მიმართულებით ხარისხის კონტროლის და უსაფრთხოების ნორმების დაცვას.

ასევე აღსანიშნავია რომ 2025 წლიდან ჯანდაცვის სამინისტრო სამედიცინო დაწესებულებებში საერთაშორისო აკრედიტაციისა და სტანდარტების დანერგვას იწყებს.