რას გვიწინასწარმეტყველებს საბედისწერო ხაზები მაჯაზე

ჩვენს რუბრიკაში ქირომანტიაზე არაერთხელ გვისაუბრია, თუმცა მაჯებზე არსებულ „სამაჯურებს“ ნაკლები ყურადღება ეთმობა. არადა, ეზოტერიკოსების თქმით, ეს ხაზები ინფორმაციას გვაწვდის ჯანმრთელობაზე, ფინანსურ კეთილდღეობასა და პირად ბედნიერებაზე.

– რამდენი „სამაჯური“ უნდა ჰქონდეს ადამიანს?

– უმეტესობას ორი მკვეთრი ხაზი აქვს, თუმცა საერთო ჯამში ოთხამდე შეიძლება იყოს. მარჯვენა ხელის ხაზები აწმყოსა და მომავალს ასახავს, მარცხენა კი – ბედისწერას. ხაზების სიღრმე, სიმკვეთრე და სიგრძე განსაკუთრებულ მნიშვნელობას ატარებს.

– ყველა ხაზს განსხვავებული დატვირთვა აქვს?

– პირველი ჯანმრთელობისა და სიცოცხლის ხაზია. მკვეთრი და უწყვეტი ხაზი კარგ ჯანმრთელობასა და ძლიერ ენერგიაზე მიუთითებს, ხოლო ტეხილი ან სუსტად გამოხატული – ჯანმრთელობის პრობლემებსა და სირთულეებზე. ტალღოვანი ფორმა შესაძლოა კონცეფციასთან დაკავშირებულ პრობლემებსაც ნიშნავდეს.

მეორე ხაზი ფინანსურ მდგომარეობას უკავშირდება. სწორი ხაზი გონებრივ შრომაზე მიუთითებს, ჯაჭვისებური – ფიზიკურზე. წყვეტილი ხაზი ნიშნავს, რომ ფინანსური სტაბილურობისთვის ადამიანს დიდი შრომა მოუწევს. ხაზზე არსებული მონაკვეთები ცხოვრების პერიოდებს ასახავს.

მესამე სიყვარულისა და ქორწინების ხაზია. ვისაც ეს ხაზი აქვს, ეზოთერიკოსების თქმით, დიდი შანსია, რომ ბედნიერ ოჯახურ ცხოვრებას მიაღწიოს. ხაზებს შორის მანძილი კი იმაზე მიუთითებს, თუ რა ასაკში შეხვდება ადამიანი თავის მეორე ნახევარს.

– რას ნიშნავს მეოთხე ხაზი?

– მეოთხე დღეგრძელობის ხაზია და საკმაოდ იშვიათად გვხვდება. მისი არსებობა ხანგრძლივ სიცოცხლეს უკავშირდება. თუ ხაზი მთელ სიგრძეზე თანაბარია, ეს კარგ ფიზიკურ და გონებრივ მდგომარეობაზეც მიანიშნებს.

ეზოთერიკოსები ხაზების სისქესა და ფორმებსაც განსაკუთრებულ მნიშვნელობას ანიჭებენ. მაგალითად, სამი მკვეთრი ხაზი გავლენიან და ავტორიტეტულ ადამიანზე მიუთითებს, ხოლო პატარა კვადრატები — „მფარველი ანგელოზის“ ნიშნად ითვლება. მათი თქმით, ეს ყველაფერი საბედისწერო განაჩენი კი არა, მინიშნებაა იმაზე, თუ რას უნდა მიაქციოს ადამიანმა ყურადღება ცხოვრებაში.