შუა საუკუნეების სახიფათო დაავადება თანამედროვე დიეტების გამო ბრუნდება - რას ამბობენ ექსპერტები

სახიფათო შუა საუკუნეების დაავადება თანამედროვე დიეტების გამო ბრუნდება. ამის შესახებ ავსტრალიელი ექიმები აქტიურად საუბრობენ. სკორბუტი, რომელიც ფართოდ იყო გავრცელებული მე-16 და მე-18 საუკუნეებში, კვლავ აქტუალური ხდება თანამედროვე დიეტების გამო. 

დაავადება პირდაპირ დამოკიდებულია C ვიტამინის არარსებობაზე (დეფიციტზე) ადამიანის ორგანიზმში. სკორბუტი გავრცელებული იყო მეზღვაურებში, რომლებსაც ჰქონდათ კვების პრობლემები ღია ზღვაზე ხანგრძლივი ყოფნის გამო.

ექიმების აზრით, უძველესი დაავადება კვლავ შეიძლება დაბრუნდეს მრავალი მიზეზის გამო. მათ შორისაა ცხოვრების ხარჯების კრიზისი (სასურსათო მაღალი ფასები), სიმსუქნე და ულტრა დამუშავებული საკვების მოხმარება - თანამედროვე დიეტის თავისებურებები.

The Times მოჰყავს საშუალო ასაკის მამაკაცის მაგალითი, რომელიც შეიყვანეს პერტის (დასავლეთ ავსტრალია) საავადმყოფოში. პაციენტს აღენიშნებოდა „იდუმალი“ სიმპტომები: მტკივნეული გამონაყარი და სისხლჩაქცევები ფეხებზე. გამოკვლევამ თავდაპირველად ექიმები შეაშფოთა - შედეგებმა გამორიცხა მათთვის ცნობილი დაავადებები და ინფექციები. თუმცა, რამდენიმე დღის შემდეგ გაირკვა, რომ მამაკაცი ჭამდა მაღალ დამუშავებულ საკვებს და თითქმის არ ჭამდა ხილსა და ბოსტნეულს. მოგვიანებით მას სკორბუტის დიაგნოზი დაუსვეს. ეს საშიში დაავადება შესაბამისი მკურნალობის გარეშე შეიძლება ფატალური იყოს - ამ დროს ადამიანი იღუპება სისხლდენით.

„ხანდახან ვხვდებით დაავადების გამოვლინებებს, განსაკუთრებით ხანდაზმულებში, ალკოჰოლზე დამოკიდებულებსა და განვითარების პრობლემების მქონე ბავშვებს შორის. სიმპტომები შეიძლება გამოჩნდეს C ვიტამინის დეფიციტიდან ერთი თვის შემდეგ“, - თქვა ექიმმა.

სკორბუტის ძირითადი სიმპტომებია წითელი ან ლურჯი ლაქები კანზე, განსაკუთრებით ფეხებსა და ტერფებზე, დაღლილობა, სახსრებისა და კუნთების ტკივილი, შეშუპება და/ან ღრძილებიდან სისხლდენა. ასევე, პაციენტებს აღენიშნებათ სისხლჩაქცევები.

რისკფაქტორებს შორის არის მოწევა, სიმსუქნე, ალკოჰოლიზმი, დიეტა და წონის დაკლების წინა ოპერაცია.

ცნობისთვის, სკორბუტი ვითარდება მაშინ, როდესაც საკვებიდან საკმარის C ვიტამინს ვერ ვიღებთ. ასევე შეიძლება განვითარდეს მაშინ, თუ ორგანიზმში C ვიტამინის შეწოვა დაქვეითებულია. კანი ხდება ფერმკრთალი, მშრალი, მყარი, ღრძილები თავდაპირველად ფერმკრთალი ხდება, შემდეგ წითლდება, შეშუპებულია და იწყებს სისხლდენას. კბილები იშლება და ცვივა. კანზე ჩნდება მკვეთრი გამონაყარი, ჩნდება ანემია, ირღვევა კუჭ-ნაწლავის ტრაქტისა და გულ-სისხლძარღვთა სისტემის ფუნქციები და იკლებს არტერიული წნევა.