რამდენს გამოიმუშავებს ხვიჩა კვარაცხელია “პსჟ”-ში?

 საფრანგეთის ლიგა 1-ს ბევრი ერთ გუნდიან ჩემპიონატადაც მოიხსენიებს პარიზული “პსჟ”-ს ფინანსური სიძლიერის გამო და სიტუაცია არც 2025 წელს შეცვლილა. გავლენიანმა ფრანგულმა გამოცემა L’equipe-მ ლიგა 1-ში მოასპარეზე ფეხბურთელების შესახებ ფინანსური ინფორმაცია გამოაქვეყნა, რომლის მიხედვითაც პირველ 12 ადგილს სწორედ “პსჟ”-ს ფეხბურთელები იკავებენ.

2024 წელს, როდესაც კლუბში კილიან მბაპე ირიცხებოდა ის თვიურად 6 მილიონ ევროს გამოიმუშავებდა, მისი მადრიდში გადაბარგების შემდეგ კი ორგანიზაციაში ხელფასების ოდენობა შემცირდა, მაგრამ ადგილობრივი ჩემპიონატის დონეზე მაინც მაღალი დარჩა.

სიაში თანასაზიარო მე-6 ადგილზე ბრაზილიელ ვიტინიასთან ერთად ქართველი შემტევი ხვიჩა კვარაცხელიაა, რომელიც კლუბს გასულ ზამთარს შეუერთდა. კვარაცხელია ბრაზილიელი თანაგუნდელის მსგავსად თვეში 900 ათას ევროს გამოიმუშავებს, რაც ისეთი ვარსკვლავების შემოსავლებს აღემატება, როგორებიც ჯანლუიჯი დონარუმა, ბრედლი ბარკოლა და ნუნო მენდეში არიან.

რეიტინგში პირველ ადგილს ხვიჩას თანაგუნდელი უსმან დემბელე იკავებს, რომლის თვიური ანაზღაურებაც 1,5 მილიონითაა განსაზღვრული.

აღსანიშნავია, რომ “პსჟ”-ს მიღმა ყველაზე შემოსავლიანი მოთამაშის სტატუსს “მარსელიდან” ადრიენ რაბიო, პიერ ემილე ჰოიბერგი და “ლიონის” ალექსანდერ ლაკაზეტი იკავებენ თვეში ნახევარ მილიონიანი ანაზღაურებით.

წლევანდელ სიაში ორი ისეთი კლუბის ფეხბურთელები შევიდნენ, რომელთა წარმომადგენლებსაც გასულ წელს ვერ ვხვდებოდით: “რენის” სეკო ფოფანა და ბრაის ბამბა, რომელთა შემოსავალიც 400 ათას ევროს აღწევს და “ნიცადან” გაეტან ლაბორდე 320 ათასი ევროთი.

ცნობისთვის, ხვიჩა კვარაცხელიას გარდა საფრანგეთის ლიგა 1-ში გიორგი მიქაუტაძე (“ლიონი”) და ზურიკო დავითაშვილიც (“სენტ-ეტიენი”) ასპარეზობენ, თუმცა ტურნირის 30 ყველაზე შემოსავლიან მოთამაშეს შორის ვერ მოხვდნენ.